பாவலரேறு பெருஞ்சித்திரனார் ☐ 97
98 முன்னேறு!
முன்னேறு முன்னேறு ஏறுமுன் னேறு!
முழுமூச்சி னோடிறுதி வரையில் முன் னேறு!
எந்நாளும் குறையாத தளராத ஊக்கம்,
ஏறுநடை கொண்டுமுன் னேறுமுன்னேறு!
பன்னூலைக் கற்றுமுன் னேறுமுன் னேறு!
பலதொழிலைக் கற்றுமுன் னேறுமுன் னேறு!
தன்னுணர்வு கொண்டுமுன் னேறுமுன் ஏறு;
தளராத உள்ளத்தி னோடுமுன் னேறு!
வருகின்ற எதிர்ப்புக்கஞ் சாதுமுன் னேறு!
வாய்மையினை உள்ளத்திற் கொண்டுமுன் னேறு!
பெறுகின்ற தோல்விக்கஞ் சாதுமுன் னேறு;
பேருயர்வை எண்ணிமுன் னேறுமுன் னேறு!
நடையில்முன் னேறு;முன் னேறுசெந் தமிழில்!
நட்பில்முன் னேறு;முன் னேறுதாய் அன்பில்;
கொடையில்முன் னேறுமுன் னேறுவிருந் தோம்பில்;
குறுகுமனப் பான்மைவிட் டேறுமுன் னேறு!
அறிவில்முன் னேறுநல் வினையில்முன் னேறு!
அழகில்முன் னேறுநற் கலையில்முன் னேறு;
பொறையில்முன் னேறு, கைத் தொழிலில்முன் னேறு!
போக்கில்முன் னேறு,நல் நோக்கில்முன் னேறு!
உண்மையைப் பற்றிமுன் னேறு;முன் னேறு!
உழைப்பினைக் கொண்டுமுன் னேறு;முன் னேறு!
பெண்மையைப் போற்றிமுன் னேறு;முன் னேறு!
பேய்மையை வீழ்த்திமுன் னேறு;முன் னேறு!
