54
கோவேந்தன்
இசைக்குப்பின் சொல்லடுக்கும் புலவன்;
எட்டுக் கால்களால் நடக்கும் அலவன்;
விசைக்குதிரை பின்நிறுத்தி!
முன்னால் வண்டி இணைக்கின்ற வலவன்;
திசைக்குத் திசை சொல்லும் பொருளும்
திக்கித் திணறும் கும்மிருட்டுப் புலவன்!
◯
ஒருத்தியினைப் பின்தொடர்ந்தான் நாடன்
இருவரின் பின் பட்டிமன்ற மூடன்;
இருவர் என்ன? முந்நான் கென்றான்
இசைத்த பொருள் முதலாளியாம் வேடன்!
உருவம் பெண்ணாய் இருந்தால் நூறு
போதும் என்றான் படம் எடுக்கும் காடன்!
◯
காய்த்து உணவிற்கு நின்றன தோட்டச் செடிகள்
கமழ்ந்து காற்றைத் தூய்மை செய்தன கொடிகள்.
ஏய்த்து மக்கட்கு இரண்டகம் செயும்
இனப்பகைவர்கள் அரசியல்முட் செடிகள்
வாய்ப்பந்தலிட்டு உட்பூசலால்
வளர்ந்து மண்டிய வெற்றுக்கட்சிக் கொடிகள்!
◯
குள்ளமனம், கூறுகெட்ட கரியன்
குருட்டறிவுத் திறமையிலே பெரியன்!
எள்ளும் வண்ணம் உவமைகூறித்
தனக்கு நிகர் தானே என்றான் விரியன்.
கொள்ளைப் பொய்யன் குப்பைத்தொட்டிக்
குவமை இல்லை என்றான் மகன் அரியன்!
