குறும்பா
61
தமிழ்த்தெய்வம் என்றுசிலை எடுத்தார்
தமிழாலயம் தலைநகரில் முடித்தார்,
தமிழியக்கம் கற்றறியான்
தலைவன் எனத் தமிழறியார் கொடுத்தார்!
தமிழால் வாழும் பெருச்சாளிகள்
தமிழ்ப்பயிரின் விளைவையுண்டு கொழுத்தார்!
◯
"அன்பே சிவம்" முதலாளி சொன்னான்.
ஆலையிலே வேலைநிறுத்தம் பன்னாள்;
கொன்று குவிக்கக் காவல்வேண்டி
ஆளவந்தார் கூட்டுடனே நின்றான்.
வன்பே சிவம் ஆயிற்றங்கே
அன்பேசிவம் ஆயிரம்பேரைக் கொன்றான்!
◯
எங்கள் ஊரின் அரசுத்துறை இயக்கி
எவரையுமே, புகழுரையால் மயக்கி,
இங்கிருந்து, மேலைநாட்டில்
‘இங்கிலீசில்’ தமிழ்ப்பண்பாட்டை முழக்கிப்
பொங்குபுகழ் கொணர்வேன் என்றான்!
புண்கொணர்ந்தான் பொய்மகளிர் முயக்கில்!
◯
கடவுள் எப்போ வருவார் என்றாள் கிள்ளை
காணாதோடி விட்டார் என்றாள் செள்ளை.
இடக்குமடக்கு இசைமுழக்கம்,
எரிச்சலூட்டும் சமற்கிருதத் தொல்லை
அடங்கிடுமேல், அன்பின்உண்மை
அரும்பிடுமேல் இறைவன் நமது பிள்ளை!
