அகப்பேய்ச் சித்தர்

• பக்கம் 212 - 223

அகப்பேய்ச் சித்தர் பாடல்கள்

அகம் தன் நெஞ்சப் பேயைத் தானே விளித்துக் கூறும் அறிவுரையாகப் பிறருக்குக் கூறுவது

1

நஞ்சுண்ண வேண்டாவே – அகப்பேய் – நாயகன் தாள் பெறவே

நெஞ்சு மலையாதே –அகப்பேய் – நீ ஒன்றும் சொல்லாதே

2

பராபர மானதடி – அகப்பேய் - பரவையாய் வந்ததடி

தராதலம் ஏழ்புவியும் - அகப்பேய் - தானே படைத்ததடி

3

நாத வேதமடி - அகப்பேய் – நன் நடம் கண்டாயோ

பாதஞ் சத்தியடி - அகப்பேய் – பரவிந்து நாதமடி

4

விந்து நாதமடி - அகப்பேய் – மெய்யாக வந்ததடி

ஐந்து பெரும் பூதம் - அகப்பேய் – அதனிடம் ஆனதடி

5

நாலு பாதமடி - அகப்பேய் – நன்னெறி கண்டாயே

மூல மான தல்லால் - அகப்பேய் – முத்தி அல்லவடி

6

வாக்காதி ஐந்தடியோ - அகப்பேய் – வந்த வகாகேளாய்

ஒக்கம் அதானடி - அகப்பேய் - உண்மையது அல்லவடி

7

சத்தா தி ஐந்தடியோ - அகப்பேய் – சாத்திரம் ஆனதடி

மித்தையும் ஆகுமடி - அகப்பேய் – மெய்யது சொன்னேனே

8

வானாதி ஐந்தடியோ - அகப்பேய் – வண்மையாய் வந்ததடி

தெசநாடி பத்தேடி - அகப்பேய் – திடன் இது கண்டாயே

9

காரணம் ஆனதெல்லாம் - அகப்பேய் – கண்டது சொன்னேனே

மாரணங் கண்டாயே - அகப்பேய் – வந்த விதங்கள் எல்லாம்

10

ஆறு தத்துவமும் - அகப்பேய் – ஆமகஞ் சொன்னதடி

மாறாத மண்டலமும் - அகப்பேய் – வந்தது மூன்றடியே

11

பிருதிவி பொன்னிறமே - அகப்பேய் – பேதமை அல்லவடி

உருவது நீரடியோ - அகப்பேய் – உள்ளது வெள்ளையடி

12

தேயு செம்மையடி - அகப்பேய் – திடனது கண்டாயே

வாயு நீலமடி - அகப்பேய் – வான்பொருள் சொல்வேனே

13

வான மஞ்சடியோ - அகப்பேய் – வந்தது நீ கேளாய்

ஊனமது ஆகாதே - அகப்பேய் – உள்ளது சொன்னேனே

14

அகாரம் இத்தனையும் - அகப்பேய் – அங்கென்று எழுந்ததடி

உகாரங் கூடியடி - அகப்பேய் - உருவாகி வந்ததடி

15

மகார மாயையடி - அகப்பேய் – மலமது சொன்னேனே

சிகார மூலமடி - அகப்பேய் – சிந்தித்துக் கொள்வாயே

16

வன்னம் புவனமடி - அகப்பேய் – மந்திர தந்திரமும்

இன்னமும் சொல்வேனே - அகப்பேய் – இம்மென்று கேட்பாயே

17

அத்தி வரை வாடி - அகப்பேய் – ஐம்பத்தோர் அட்சரமும்

மித்தையாங் கண்டாயே - அகப்பேய் – மெய்யென்று நம்பாதே

18

தத்துவம் ஆனதடி - அகப்பேய் – சகலமாய் வந்ததடி

புத்தியுஞ் சொன்னேனே - அகப்பேய் – பூத வடிவலவோ

19

இந்த விதங்களெல்லாம் - அகப்பேய் – எம்இறை அல்லவடி

அந்த விதம் வேறே - அகப்பேய் – ஆராய்ந்து காணாயோ

20

பாவந் தீரவென்றால் - அகப்பேய் – பாவிக்க லாகாதே

சாவதும் இல்லையடி - அகப்பேய் – சற்குரு பாதமடி

21

எத்தனை சொன்னாலும் - அகப்பேய் – என் மனந் தேறாதே

சித்தும் மசித்தும் விட்டே - அகப்பேய் – சேர்த்து நீ காண் பாயே

22

சமய மாறுமடி - அகப்பேய் – தம்மாலே வந்தவடி

அமைய நின்றவிடம் - அகப்பேய் – ஆராய்ந்து சொல்வாயே

23

ஆறாரும் ஆகுமடி - அகப்பேய் – ஆகாது சொன்னேனே

வேறே உண்டானால் - அகப்பேய் – மெய்யது சொல்வாயே

24

உன்னை அறிந்தக்கால் - அகப்பேய் - ஒன்றையும் சேராயே

உன்னை அறியும் வகை - அகப்பேய் – உள்ளது சொல்வேனே.

25

சரியை ஆகாதே - அகப்பேய் – சாலோகங் கண்டாயே

கிரியை செய்தாலும் - அகப்பேய் – கிட்டுவது ஒன்றுமில்லை

26

யோகம் ஆகாதே - அகப்பேய் – உள்ளது கண்டக்கால்

தேக ஞானமடி - அகப்பேய் – தேடாது சொன்னேனே

27

ஐந்தலை நாகமடி – அகப்பேய் – ஆதாயங் கொஞ்சமடி

இந்த விடந்தீர்க்கும் – அகப்பேய் – எம் இறை கண்டாயே

28

இறைவன் என்ற தெல்லாம் – அகப்பேய் – எந்த விதமாகும்

அறைய நீ கேளாய் – அகப்பேய் – ஆனந்த மானதடி

29

கண்டு கொண்டேனே – அகப்பேய் – காதல் கொண்டேனே

உண்டு கொண்டேனே – அகப்பேய் – உள்ளது சொன்னாயே

30

உள்ளது சொன்னாலும் – அகப்பேய் – உன்னாலே காண்பாயே

கள்ளமுந் நீராதே – அகப்பேய் – கண்டார்க்குக் காமமடி

31

அறிந்து நின்றாலும் – அகப்பேய் – அஞ்சார்கள் சொன்னேனே

புரிந்த வல்வினையும் – அகப்பேய் – போகாதே உன்னை விட்டு

32

ஈசன் பாசமடி – அகப்பேய் – இவ்வண்ணங் கண்ட தெல்லாம்

பாசம் பயின்றதடி – அகப்பேய் – பரமது கண்டாயே

33

சாத்திர சூத்திரமும் – அகப்பேய் – சங்கற்பம் ஆனதெல்லாம்

பார்த்திடல் ஆகாதே – அகப்பேய் –பாழ் பலங்கண்டாயே

34

ஆறு கண்டாயோ – அகப்பேய் – அந்த வினை தீர

தேறித் தெளிவதற்கே – அகப்பேய் – தீர்த்தமும் ஆடாயே

35

எத்தனை காலமுந்தான் – அகப்பேய் – யோகம் இருந்தாலென்

முத்தனு மாவாயோ – அகப்பேய் – மோட்சமும் உண்டாமோ

36

நாச மாவதற்கே – அகப்பேய் – நாடாதே சொன்னேனே

பாசம் போனாலும் – அகப்பேய் – பசுக்களும் போகாவே

37

நாணம் ஏதுக்கடி – அகப்பேய் – நல்வினை தீர்ந்தக்கால்

காண வேணுமென்றால் – அகப்பேய் – காணக் கிடையாதே

38

சும்மா இருந்து விடாய் – அகப்பேய் – சூத்திரஞ் சொன்னேனே

சும்மா இருந்தவிடம் – அகப்பேய் – சுட்டது கண்டாயே

39

உன்றனைக் காணாதே – அகப்பேய் – ஊனுள் நுழைந்தாயே

என்றனைக் காணாதே – அகப்பேய் – இடத்தில் வந்தாயே

40

வானம் ஓடிவரில் – அகப்பேய் – வந்தும் பிறப்பாயே

தேனை உண்ணாமல்– அகப்பேய் – தெருவோடு அலைந்தாயே

41

சைவ மானதடி – அகப்பேய் – தானாய் நின்றதடி

சைவம் இல்லையாகில் – அகப்பேய் – சலம் வரும் கண்டாயே

42

ஆசை அற்றவிடம் – அகப்பேய் – ஆசாரங் கண்டாயே

ஈசன் பாசமடி – அகப்பேய் – எங்ஙனஞ் சென்றாலும்

43

ஆணவ மூலமடி – அகப்பேய் – அகாரமாய் வந்ததடி

கோணும் உகாரமடி – அகப்பேய் – கூடப் பிறந்ததுவே

44

ஒன்றும் இல்லையடி – அகப்பேய் – உள்ளபடி யாச்சே

நன்றிலை தீதிலையே – அகப்பேய் – நாணமும் இல்லையடி

45

சும்மா இருந்தவிடம் – அகப்பேய் – சுட்டது சொன்னேனே

எம்மாயம் இதறியேன் – அகப்பேய் – என்னையும் காணேனே

46

கலைகள் ஏதுக்கடி – அகப்பேய் – கண்டார் நகையாரோ

நிலைகள் ஏதுக்கடி – அகப்பேய் – நீயார் சொல்வாயே

47

இந்து அமிர்தமடி – அகப்பேய் – இரவி விடமோடி

இந்து வெள்ளையடி – அகப்பேய் – இரவி சிவப்பாமே

48

ஆணல பெண்ணலவே – அகப்பேய் – அக்கினி கண்டாயே

தாணுவும் இப்படியே – அகப்பேய் – சற்குரு கண்டாயே

49

என்ன படித்தாலும் – அகப்பேய் – எம்முரை யாகாதே

சொன்னது கேட்டாயே – அகப்பேய் – சும்மா இருந்துவிடு

50

காடும் மலையுமடி – அகப்பேய் – கடுந்தவம் ஆனால் என்

வீடும் வெளியாமோ – அகப்பேய் –மெய்யாக வேண்டாவோ

51

பரத்தில் சென்றாலும் – அகப்பேய் – பாரிலே மீளுமடி

பரத்துக்கு அடுத்த இடம் – அகப்பேய் – பாழது கண்டாயே

52

பஞ்ச முகமேது – அகப்பேய் – பஞ்சு படுத்தாலே

குஞ்சித பாதமடி – அகப்பேய் – குருபாதங் கண்டாயே

53

பங்கம் இல்லையடி – அகப்பேய் – பாதம் இருந்தவிடம்

கங்கையில் வந்ததெல்லாம் – அகப்பேய் – கண்டு தெளிவாயே

54

தானற நின்றவிடம் – அகப்பேய் – சைவங் கண்டாயே

ஊனற நின்றவர்க்கே – அகப்பேய் – ஊனமொன்று இல்லையடி

55

சைவம் ஆருக்கடி – அகப்பேய் – தன்னை அறிந்தவர்க்கே

சைவ மானவிடம் – அகப்பேய் – சற்குரு பாதமடி

56

பிறவி தீரவென்றால் – அகப்பேய் – பேதகம் பண்ணாதே

துறவி யானவர்கள் – அகப்பேய் – சும்மா இருப்பார்கள்

57

ஆரலைந்தா லும் – அகப்பேய் – நீயலையா தேயடி

ஊரலைந்தா லும் – அகப்பேய் – ஒன்றையும் நாடாதே

58

தேனாறு பாயுமடி – அகப்பேய் – திருவடி கண்டவர்க்கே

ஊனாறு மில்லையடி – அகப்பேய் – ஒன்றையும் நாடாதே

59

வெள்ளை கறுப்பாமோ – அகப்பேய் – வெள்ளியுஞ் செம்பாமோ

உள்ளது உண்டோடி – அகப்பேய் – உன் ஆணை கண்டாயே

60

அறிவுள் மன்னுமடி – அகப்பேய் – ஆதாரம் இல்லையடி

அறிவு பாசமடி – அகப்பேய் – அருளது கண்டாயே

61

வாசியி லேறியபடி – அகப்பேய் – வான் பொருள் தேடாயோ

வாசியில் ஏறினாலும் – அகப்பேய் – வாராது சொன்னேனே

62

தூராதி தூரமடி – அகப்பேய் – தூரமும் இல்லையடிப்

பாராமற் பாரடியோ – அகப்பேய் – பாழ்வினைத் தீரவென்றால்

63

உண்டாக்கிக் கொண்டதல்ல – அகப்பேய் – உள்ளது சொன்னேனே

கண்டார்கள் சொல்வாரோ – அகப்பேய் – கற்பனை அற்றதடி

64

நாலு மறை காணா – அகப்பேய் – நாதனை யார் காண்பார்

நாலு மறை முடிவில் – அகப்பேய் – நற்குரு பாதமடி

65

மூலம் இல்லையடி – அகப்பேய் – முப்பொருள் இல்லையடி

மூலம் உண்டானால் – அகப்பேய் – முத்தியும் உண்டாமே

66

இந்திர சாலமடி – அகப்பேய் – எண்பத் தொருபதமும்

மந்திரம் இப்படியே – அகப்பேய் – வாயைத் திறவாதே

67

பாழக வேணுமென்றால் – அகப்பேய் – பார்த்ததை நம்பாதே

கேளாமற் சொன்னேனே – அகப்பேய் – கேள்வியும் இல்லையடி

68

சாதி பேதமில்லை – அகப்பேய் – தானாகி நின்றவர்க்கே

ஓதி உணர்ந்தாலும் – அகப்பேய் – ஒன்றுந்தான் இல்லையடி

69

சூழ வானமடி – அகப்பேய் – சுற்றி மரக்காவில்

வேழம் உண்டகனி – அகப்பேய் – மெய்யது கண்டாயே

70

நானும் இல்லையடி – அகப்பேய் – நாதனும் இல்லையடி

தானும் இல்லையடி – அகப்பேய் – சற்குரு இல்லையடி

71

மந்திரம் இல்லையடி – அகப்பேய் – வாதனை இல்லையடி

தந்திரம் இல்லையடி – அகப்பேய் – சமயம் அழிந்ததடி

72

பூசை பாசமடி – அகப்பேய் – போதமே கொட்டமடி

ஈசன் மாயையடி – அகப்பேய் – எல்லாமும் இப்படியே

73

சொல்ல லாகாதே – அகப்பேய் – சொன்னாலுந் தோடமடி

இல்லை இல்லையடி – அகப்பேய் – ஏகாந்தங் கண்டாய்

74

தத்துவத் தெய்வமடி – அகப்பேய் – சதாசிவ மானதடி

மற்றுள்ள தெய்வமெல்லாம் – அகப்பேய் – மாயை வடிவாமே

75

வார்த்தை அல்லவடி – அகப்பேய் – வாச மகோசரத்தை

ஏற்ற தல்லவடி – அகப்பேய் – என்னுடன் வந்ததல்ல

76

சாத்திரம் இல்லையடி – அகப்பேய் – சலனங் கடந்ததடி

பார்த்திடல் ஆகாதே – அகப்பேய் – பாவனைக் கெட்டாதே

77

என்ன புடித்தால் என் – அகப்பேய் – ஏது தான் செய்தால் என்

சொன்ன விதங்களெலாம் – அகப்பேய் – சுட்டது கண்டாயே

78

தன்னை அறியவேணும் – அகப்பேய் – சாராமற் சாரவேணும்

பின்னை அறிவதெலாம் – அகப்பேய் – பேயறி வாகுமடி

79

பிச்சை எடுத்தாலும் – அகப்பேய் – பிறவி தொலையாதே

இச்சை அற்றவிடம் – அகப்பேய் – எம்இறை கண்டாயே

80

கோலம் ஆகாதே – அகப்பேய் – குதர்க்கம் ஆகாதே

சாலம் ஆகாதே – அகப்பேய் – சஞ்சலம் ஆகாதே

81

ஒப்பனை அல்லவடி – அகப்பேய் – உன் ஆணை சொன்னேனே

அப்புடன் உப்பெனவே – அகப்பேய் – ஆராய்ந்து இருப்பாயே

82

மோட்சம் வேண்டார்கள் – அகப்பேய் – முத்தியும் வேண்டார்கள்

தீட்சை வேண்டார்கள் – அகப்பேய் – சின்மய மானவர்கள்

83

பாலன் பிசாசமடி – அகப்பேய் – பார்த்தக்கால் பித்தனடி

கால மூன்றுமல்ல – அகப்பேய் – காரியம் அல்லவடி

84

கண்டதும் இல்லையடி – அகப்பேய் – கண்டவர் உண்டானால்

உண்டது வேண்டடியோ – அகப்பேய் – உன் ஆணை சொன்னேனே

85

அஞ்சையும் உண்ணாதே – அகப்பேய் – ஆசையுடன் வேண்டாதே

நெஞ்சையும் விட்டு விடு – அகப்பேய் – நிட்டையில் சாராதே

86

நாதாந்த உண்மையிலே – அகப்பேய் – நாடாதே சொன்னேனே

மீதான சூதானம் – அகப்பேய் – மெய்யென்று நம்பாதே

87

ஒன்றோடு ஒன்று கூடில் – அகப்பேய் – ஒன்றுங் கெடுங்காணே

நின்ற பரசிவமும் – அகப்பேய் – நில்லாது கண்டாயே

88

தோன்றும் வினைகளெலாம் – அகப்பேய் – சூனியங் கண்டாயே

தோன்றாமல் தோன்றிவிடும் – அகப்பேய் – சுத்த வெளிதனிலே

89

பொய்யென்று சொல்லாதே – அகப்பேய் – போக்கு வரத்துதானே

மெய்யென்று சொன்னக்கால் – அகப்பேய் – வீடு பெறலாமே

90

வேதம் ஓதாதே – அகப்பேய் – மெய் கண்டோம் என்னாதே

பாதம் நம்பாதே – அகப்பேய் – பாவித்துப் பாராதே