அ. மருதகாசி-பாடல்கள்/சமூகம்
சமூகம்
(தொகையறா)
- சத்தியம் பொய்யாகும்! தருமம் தலைசாயும்!
- அறநெறிகள் அலைமோதும்! அதர்மம் அரசாளும்!
- பருவ நிலை மாறும்! பசுமைக்குப் பஞ்சம் வரும்!
- வறுமை சதிராடும்! மண்ணுலகே நரகாகும்!
(பாட்டு)
- அது முத்திய கலியின் அடையாளம்!
- அதன் முடிவே கல்கி அவதாரம்!
- எங்கும் கலப்படம் எதிலும் கலப்படம்!
- என்னும் நிலைமை வரும்-அது
- பிஞ்சுக் குழந்தைகள் உண்ணும் உணவிலும்
- பெரிதும் கலந்து விடும்!(அது)
- அருந்தும் மருந்தில் நஞ்சைக் கலக்கி
- அழகுச் சிமிழில் அடைத்து மயக்கி
- விற்பனை செய்பவர் வளமடைவார்-பெரும்
- வியாபாரிகள் எனும் பெயரடைவார்!(அது)
- மானாட்டம் மயிலாட்டம் மலராட்டம் கொடியாட்டம்
- மகிழ்வூட்டும் பரதக்கலை-கண் வழியே
- மனங்காட்டும் புனிதக்கலை-மாறி
- நாயாட்டம் பேயாட்டம் நரியாட்டம் கரியாட்டம்
- வெறியூட்டும் அங்கங்களைத்-தெளிவாக
- வெளிக்காட்டும் புதியகலை!(அது)
- புல்லரும் பொய்யரும் கள்வரும் கயவரும்
- புயவலி கொண்டாட-பெரும்
- செல்வமிகுந்தவர் வல்லமையுற்றவர்
- ஜெயம் ஜெயமென்றாட-மிக
- நல்லவர் ஏழைகள் ஞானிகள் மானிகள்
- உள்ளம் பதைத்தாட-கொடும்
- நாலாம் யுகமது முடிவுறும் நாள்வர
- கோள்களும் கூத்தாட-மனிதப் பேய்களும் கூத்தாட!
- "வெடி படு மண்டத் திடிபல தாளம் போடும்-வெட்ட
- வெளியிலிரத்தக் களியோடு பூதம் பாடும்"-சட்டச்
- சட சட வென்று எரிமலை வெடித்தே சாடும்-கட்டக்
- கட கட கட வென பூமி பிளந்தேயாடும்!
- புயலுமெழுந்திடும்! மழையும் பொழிந்திடும்!
- அலைகடல் பொங்கும் உலகையழிக்கும்
- ப்ரளயம்-மஹாப்ரளயம்-மஹாப்ரளயம்.
தசாவதாரம்-1975
- இசை : ராஜேஸ்வரராவ்
- பாடியவர் : A. L. மகாராஜன்
- பாலுந் தேனும் பெருகி ஓடுது
- பரந்த சீமையிலே நாம்
- பொறந்த சீமையிலே! ஆனா
- பாடு படுறவன் வயிறு காயுது
- பாதி நாளையிலே-வருஷத்தில்
- பாதி நாளையிலே!
- ஒ....என்னடா தம்பி நேராப்போடா
- மனுஷனை மனுஷன் சாப்பிடுறாண்டா
- தம்பிப் பயலே-இது
- மாறுவதெப்போ? தீருவதெப்போ?
- நம்ம கவலே!
- வானம் பொழியுது! பூமி விளையுது!
- தம்பிப் பயலே-நாம்
- வாடி வதங்கி வளப்படுத்துறோம் வயலே-ஆனா
- தானியமெல்லாம் வலுத்தவனுடைய கையிலே-இது
- தகாதுயின்னு எடுத்துச் சொல்லியும் புரியலே-அதாலே
(மனுஷனை)
- தரையைப் பார்த்து நிக்குது நல்ல கதிரு-தன்
- குறையை மறந்து மேலே பாக்குது பதரு-அதுபோல்
- அறிவு உள்ளது அடங்கிக் கிடக்குது வீட்டிலே-எதுக்கும்
- ஆகாத சிலது ஆர்ப்பாட்டம் பண்ணுது நாட்டுலே-அதாலே
(மனுஷனை)
- ஆணவத்துக்கு அடிபணியாதே தம்பிப்பயலே-எதுக்கும்
- ஆமாம்சாமி போட்டுவிடாதே தம்பிப்பயலே!
- பூனையைப் புலியாய் எண்ணிவிடாதே தம்பிப்பயலே ஒன்னைப்
- புரிஞ்சுக்காம நடக்காதேடா தம்பிப்பயலே!-டேய்
(மனுஷனை)
தாய்க்குப்பின் தாரம்-1956
- இசை : K. V. மகாதேவன்
- பாடியவர் : T. M. சௌந்தரராஜன்
- இன்னொருவர் தயவெதற்கு?
- இந் நாட்டில் வாழ்வதற்கு!
- இல்லையென்ற குறையும் இங்கே
- இனிமேலும் ஏன் நமக்கு?
- கன்னித்தாய் காவேரி எந்நாளும் துணையிருக்க!
- கைகளிலே உழைப்பதற்கு பலமிருக்க திறமிருக்க!
- பொன்விளையும் பூமியெனும் கண்ணான நிலமிருக்க!
- புகழுடனே உலகையாண்ட இனம் என்ற பெயரிருக்க! (இ)
- எண்ணத்தால் இமயம் போலே உயர்ந்து விட்ட மனமிருக்க!
- லட்சியமே உயிராகக் கொண்டாடும் குணமிருக்க!
- முன்னேற்றப் பாதையிலே அறிவோடு நாம் நடக்க!
- கண்ணோட்டம் கொண்டவர்கள் வழிகாட்டக் காத்திருக்க! (இ)
- வந்தாரை வரவேற்று வாழவைத்த தென்னாடு!
- வள்ளுவனார் பொது மறையை வழங்கிய நம்நாடு!
- இந்நாடு பிறர்கையை எதிர்பார்த்து வாழுவதா?
- எந்நாளும் துயர்மேகம் நம்மீது சூழுவதா?
தங்கரத்தினம்-1960
- இசை : K. V. மகாதேவன்
- பாடியவர் : P சுசிலா
- ஒயிங்கு தவறாமெ!
- ஊரெ எத்தி வாயாமெ
- பொயிதெ வீணாக்காமெ
- புவ்வாவ தேடிக்கணும்!
- ஆனாக்க அந்த மடம்
- ஆவாட்டி சந்தெமடம்!
- அதுவும் கூட இல்லாகாட்டி
- ப்ளாட்டுபாரம் சொந்த இடம்!(ஆனா)
- மச்சுலே இருந்தாத்தான்
- மவுசுயிண்ணு எண்ணாதே!
- குச்சுலே குடியிருந்தா
- கொறச்சலுண்ணு கொள்ளாதே!
- மச்சு குச்சு எல்லாமெ
- மனசுலே தானிருக்கு!
- மனசு நெறஞ்சிருந்தா
- மத்ததும் நெறஞ்சிருக்கும்!(ஆனா)
- கெடைச்சா கஞ்சித்தண்ணி!
- கெடைக்காட்டி கொயாத்தண்ணி!
- இருக்கவே இருக்கையிலே
- இன்னாத்துக்குக் கவலை கண்ணி!
- மரத்தெப் படெச்சவன் தான்
- மனுசாளைப் படைச்சிருக்கான்!
- வாறதெ ஏத்துக்கதான்
- மனசெ கொடுத்திருக்கான் !
- தெட்டிக்கினு போறதுக்கு
- திருடன் வருவான்னு
- துட்டுள்ள சீமாங்க
- தூங்காமெ முயிப்பாங்க!
- துட்டும் கையிலே இல்லே!
- தூக்கத்துக்கும் பஞ்சமில்லே!
- பொட்டியும் தேவையில்லே!
- பூட்டுக்கும் வேலையில்லே!
ஆயிரம் ரூபாய்-1964
- இசை : K. V. மகாதேவன்
- பாடியவர் : P. சுசிலா
- காட்டு மல்லி பூத்திருக்க
- காவல் காரன் பாத்திருக்க
- ஆட்டம் போட்டு மயிலைக் காளை
- தோட்டம் மேயப் பாக்குதடா!
- மாட்டுக்கார வேலா! ஓம்
- மாட்டைக் கொஞ்சம் பார்த்துக்கடா!(காட்டு)
- கோட்டைச் சுவர் போல வேலி இருக்கு!
- குத்தும் கருவேல முள்ளுமிருக்கு!
- தோட்டக்காரன் கையில் கம்பு மிருக்கு!
- சுத்திச் சுழட்டவே தெம்புமிருக்கு!
- மாட்டுக்கார வேலா! ஓம்
- மாட்டைக் கொஞ்சம் பார்த்துக்கடா!(காட்டு)
- போகாத பாதையிலே போகக் கூடாது-சும்மா
- புத்தி கெட்டு அங்கும் இங்கும் சுத்தக்கூடாது!
- மாடாகவே மனுஷன் மாறக் கூடாது!
- மற்றவங்க பொருளுமேலே
- ஆசை வைக்க கூடாது!
- மாட்டுக்கார வேலா! ஒம்
- மாட்டைக் கொஞ்சம் பாத்துக்கடா!(காட்டு)
வண்ணக்கிளி-1959
- இசை : K. V. மகாதேவன்
- பாடியவர் : சீர்காழி கோவிந்தராஜன்
- பட்டு : கொஞ்சிக் கொஞ்சிப் பேசி மதிமயக்கும்!
- வஞ்சகரின் உலகம் வலை விரிக்கும்!
- நஞ்சை நெஞ்சிலே மறைத்திருக்கும் !
- நம்பும் நல்லவர் குடி கெடுக்கும்!
- உண்மையிதை உணர்ந்து நன்மைபெறப் படித்து
- உலகில் பெரும் புகழ் சேர்த்திடடா!
- குமரன் : பள்ளிக்குச் சென்று கல்வி பயின்று
- பலரும் போற்றப் புகழ் பெறுவேன்!
- பட்டு : சபாஷ்!
- அக்கம் பக்கமே பாராது!
- ஆட்டம் போடவும் கூடாது!
- அழுவதும் தவறு! அஞ்சுவதும் தவறு!
- எது வந்த போதிலும் எதிர்த்து நில்லு!
- குமரன் : அஞ்சா நெஞ்சம் கொண்டு வாழ்வேன்!
- இந்த நாட்டின் வீரனாவேன்!
- பட்டு : சபாஷ்!
- தன்னந்தனிமையில் நீயிருந்தால்
- துன்பப் புயலுமே உனைச் சூழ்ந்தால்
- கண்கலங்குவாயா? துணிந்து நிற்பாயா?
- கண்மணி எனக்கதை சொல்லிடு நீ!
- குமரன் : புயலைக் கண்டு நடுங்கமாட்டேன்!
- முயன்று நானே வெற்றி கொள்வேன்!
- பட்டு : சபாஷ்!
கைதி கண்ணாயிரம்-1960
- இசை : K. V. மகாதேவன்
- பாடியவர்: P. சுசிலா தொகையறா
- ஆண் : மந்தரையின் போதனையால் மனம் மாறிகைகேயி
- மஞ்சள் குங்குமம் இழந்தாள்!
- வஞ்சகச் சகுனியின் சேர்க்கையால் கௌரவர்கள்
- பஞ்ச பாண்டவரை பகைத்தழிந்தார்!
- சிந்தனையில் இதையெல்லாம் சிறிதேனும் கொள்ளாமல்
- மனிதரெல்லாம் மந்தமதியால் அறிவு மயங்கி
- மனம் போன படி நடக்கலாமா?
(பாட்டு)
- கோரஸ் : ஒற்றுமையாய் வாழ்வதாலே
- உண்டு நன்மையே!
- வேற்றுமையை வளர்ப்பதனாலே
- விளையும் தீமையே!(ஒற்)
- உணர்வோடு ஒன்றியே உருவாகும் பாடமே
- அணையாத தீபமாய்ச் சுடர் என்றும் வீசுமே
- ஆண் : நெஞ்சில்-உண்டான அன்பையே
- துண்டாடி வம்பையே
- உறவாகத் தந்திடும்
- சிலர் சொல்லை நம்பியே
- இருவரும் : வேற்றுமையை வளர்ப்பதனாலே விளையும் தீமையே!
- கோரஸ் : ஒற்றுமையாய் !!
- இருவரும்: துணையின்றி வெண்புறா தனியாக வந்ததே!
- வன வேடன் வீசிய வலை தன்னில் வீழ்ந்ததே!
- ஆண் : இனம் யாவும் சேர்ந்து தான் அதை மீட்டுச் சென்றதே
- கதையான போதிலும் கருத்துள்ள பாடமே!
- இருவரும்: வேற்றுமையை வளர்ப்பதனாலே விளையும் தீமையே!
- கோரஸ்: ஒற்றுமையாய்...!
- இனத்தாலே, ஒன்று நாம்!
- மொழியாலும் ஒன்றுதான்!
- இணையில்லா தாயகம்
- நமக்கெல்லாம் வீடுதான்!
- ஒரு தாயின் சேய்கள் நாம்!
- இது என்றும் உண்மையே!
- அறிவோடு நாமிதை
- மறவாமல் எண்ணியே
- ஒற்றுமையாய் வாழ்வதாலே
- உண்டு நன்மையே!
பாகப்பிரிவினை-1959
- இசை : விஸ்வநாதன், ராமமூர்த்தி
- பாடியவர்கள் : சீர்காழி கோவிந்தராஜன் & L. R. ஈஸ்வரி குழுவினர்
- கண்ணை நம்பாதே! உன்னை ஏமாற்றும்!
- உன்னை ஏமாற்றும் நீ காணும் தோற்றம்
- உண்மையில்லாதது!
- அறிவை நீ நம்பு உள்ளம் தெளிவாகும்!
- அடையாளம் காட்டும்! பொய்யே சொல்லாதது!
- காவலரே வேஷமிட்டால் கள்வர்களும் வேற்றுருவில்
- கண்முன்னே தோன்றுவது சாத்தியமே!
- காத்திருந்து கள்வருக்குக் கை விலங்கு பூட்டிவிடும்
- கண்ணுக்குத் தோணாத சத்தியமே!
- போடும் பொய்த் திரையைக் கிழித்து விடும் காலம்!
- புரியும் அப்போது மெய்யான கோலம்!(கண்)
- ஓம் முருகா என்று சொல்லி உச்சரிக்கும் சாமிகளே
- உருத்திராட்சப் பூனைகளாய் வாழுறீங்க:
- சீமான்கள் போர்வையிலே சாமான்ய மக்களையே
- ஏமாற்றிக் கொண்டாட்டம் போடுறீங்க!
- பொய்மை எப்போதும் ஓங்குவதுமில்லை!
- உண்மை எப்போதும் தூங்குவது மில்லை!(கண்)
- பொன் பொருளைக் கண்டவுடன்
- வந்த வழி மறந்து விட்டுக்
- கண்மூடி போகிறவர் போகட்டுமே!
- என் மனதை நானறிவேன்!
- என் உறவை நான் மறவேன்!
- எது ஆன போதிலும் ஆகட்டுமே!
- நன்றி மறவாத நல்ல மனம் போதும்!
- என்றும் அதுவே என் மூலதனம் ஆகும்.(கண்)
நினைத்ததை முடிப்பவன்-1975
- இசை : எம். எஸ். விஸ்வநாதன்
- பாடியவர்: T. M. சௌந்தரராஜன்
- மதியாதார் வாசல் மதித்தொருக்கால் சென்று
- மிதியாமை கோடி பெறும் என்ற
- மதி சொன்ன ஔவை மொழி தன்னைப் போற்றி
- வாழ்வதே பெருமை தரும்!
- மண்மீது மானம் ஒன்றே ப்ரதானம்
- என்றெண்ணும் குணம் வேணும்-இதை
- மறந்தாலே வாழ்வில் கிடைக்கும் சன்மானம்
- மாறாத அவமானம்!(மண்)
- கண்ணான கணவன் தன்மானம் தன்னைக்
- காப்பாற்றும் பெண் தெய்வம்-மனம்
- புண்ணாகிச் சிந்தும் கண்ணீரைக் காணப்
- பொறுக்காதடா தெய்வம்!
- எண்ணாத இன்பம் எது வந்த போதும்
- எதிர் கொள்ளத் தயங்காதே!
- எளியோருக்காக நீ செய்த த்யாகம்
- இதை லோகம் மறவாதே!(மண்)
- அழியாத இன்பம் புவியோர்கள் எண்ணும்
- பணங் காசிலே இல்லை-மெய்
- அன்பே எந்நாளும் அழியாத இன்பம்
- அதற்கீடு வேறில்லை!
சதாரம்-1956
- இசை : G. ராமநாதன்
- பாடியவர் : திருச்சி லோகநாதன்
- ஆண் : காலணா மிஞ்சாதையா!
- காலணா மிஞ்சாதையா!
- பெண் : ஆலையில் பாடு படும்
- ஏழைகள் வாழ்வினிலே(காலணா)
- ஆண் : ஜாலியாய் வாழ்ந்திடலாம்
- ஜாலியாய் வாழ்ந்திடலாம்
- நினைத்தால் உலகையெல்லாம்
- பணத்தால் வாங்கிடலாம்!
- பெண் : பாட்டாளியே வறுமைக்
- கூட்டாளியே-எண்ணிப்
- பாரய்யா உன்நிலையை இந்நாளிலே!
- ஆண் : நோட்டாக வந்த
- கூட்டாளியே-மனக்
- கோட்டையெல்லாம் உன்னால் ஈடேறும்!
- பெண் : ஒண்ட நிழல் சொந்தமில்லே!
- ஓய்வுமட்டும் சிறிதுமில்லே!
- ஆண் : கண்டபடி களிப்புறவே
- காலந்தான் போதவில்லே!
- கோரஸ் : ஆலையில் பாடுபடும்
- ஏழைகள் வாழ்வினிலே!(காலணா)
- ஆண் : பணநாதனே உந்தன்
- அருட் பார்வையால் -இந்தப்
- பார்மீது உழைக்காமல் பொருளீட்டுவோம்!
- பெண் : பசியாறவே ஏழ்மைப்
- பகைதீரவே - பகல்
- இரவென்றும் பாராமல் பணியாற்றுவோம்!
- பெண் : காலம் மாறிடுமா!
- கவலை தீர்ந்திடுமா?
- ஆலையில் பாடுபடும்
- ஏழைகள் வாழ்வினிலே(காலணா)
அவன் அமரன்-1958
- இசை : இப்ராஹிம்
- மண்ணிலே பொன் கிடைக்கும்!
- மரத்திலே கனி கிடைக்கும்!
- எண்ணத்திலே தாழ்ந்துவிட்ட மனிதர்களால்-இந்த
- உலகத்திலே பிறருக்கென்ன சுகங் கிடைக்கும்!
- சின்னஞ்சிறு சிப்பிகூட முத்து தரும்!-கொட்டும்
- தேனீக்கள் சுவை மிகுந்த தேனைத்தரும்!
- செங்கரும்பு உருவிழந்தும் சாறு தரும்!-தான்
- செத்த பின்னும் யானை கூடத் தந்தம் தரும்!
- எண்ணத்திலே தாழ்ந்து விட்ட மனிதர்களால்-இந்த
- உலகத்திலே பிறருக்கென்ன சுகங் கிடைக்கும்!
- மனிதராகப் பிறந்ததினால் மனிதரில்லை-பெரும்
- மாளிகையில் வசிப்பதனால் உயர்வுமில்லை!
- குணத்தால் சிறந்தவரே உயர்ந்தவராம்-அந்தக்
- கொள்கையுள்ள நல்லவரே மனிதர்களாம்!
நல்லவன் வாழ்வான்-1961
- இசை : T. R. பாப்பா
- அறிவுக்கு விருந்தாகும் திருக்குறளே!-வள்ளுவர்
- ஆக்கி நமக்களித்த அரும் பொருளே!
- (அறி)
- உடலுக்கு உயிர் போலே!
- உலகுக்கு ஒளிபோலே!
- பயிருக்கு மழை போலே!
- பைந்தமிழ் மொழியாலே!
- (அறி)
- அறம் பொருள் இன்பம் எனப்படும் முப்பாலே!
- அனுபவத்தாலே தான் சுவைத்ததற்கப்பாலே!
- அவனியில் உள்ளோர்கள் அனைவரும் தனைப்போலே
- அவசியம் கற்றுணர்ந்து பயன் பெறும் நினைப்பாலே!
- (அறி)
- வாழும் வழிமுறைக்கு இலக்கணமானது!
- மனம்மொழி மெய்இனிக்க வார்த்திட்ட தேனது!
- வானகம்போல் விரிந்த பெரும் பொருள் கொண்டது!-எம்
- மதத்திற்கும் பொதுவென்னும் பாராட்டைக்கண்டது!
அறிவாளி-1963
- இசை : S.V. வெங்கட்ராமன்
- பாடியவர் : T. M. சௌந்தரராஜன்
(தொகையறா)
- அறிவிருக்கும் அன்பிருக்கும் பண்பிருக்கும் சிலரிடம்!
- அழகிருக்கும் பணமிருக்கும் பகட்டிருக்கும் பலரிடம்!
பாட்டு
- இது தெரியும்!
- அது தெரியாது!
- ஏழடுக்கு மாளிகையில் இருக்கிற பேர்வழிக
- எத்தனையோ தப்புத்தண்டா பண்ணுவாங்க!
- ஏழை எளியவங்க இல்லாத காரணத்தால்
- ஏதோ சிறு தவறு பண்ணுவாங்க!
- ஜாலி மைனர்கள் விசிறி மடிப்பிலே
- கிழிசல் ஒரு கோடி இருக்கும்!-தொழி
- லாளி துவைச்சு உடுத்தும் உடையிலே
- தையல் பல ஓடி இருக்கும்!
- கனதனவானின் நெஞ்சில் எந்நாளும்
- கபடம் பொறாமை எனும் அழுக்கிருக்கும்!
- கள்ளம் அறியாத பாட்டாளி மேனியில்
- உள்ளபடி வேர்வை அழுக்கிருக்கும்!
- (இது)
- உள்ளபடி வேர்வை அழுக்கிருக்கும்!
அல்லி பெற்ற பிள்ளை-1959
- இசை : K. V. மகாதேவன்
- இது தான் உலகமடா!-மனிதா
- இது தான் உலகமடா!-பொருள்
- இருந்தால் வந்து கூடும்-அதை
- இழந்தால் விலகி ஒடும்!
- உதைத்தவன் காலை முத்தமிடும்!
- உத்தமர் வாழ்வைக் கொத்தி விடும்!
- உதட்டில் உறவும் உள்ளத்தில் பகையும்
- வளர்த்தே அறிவை மாய்த்து விடும்!
- பொருள்-இருந்தால் வந்து கூடும்!
- அதை இழந்தால் விலகி ஓடும்!(இது)
- உழைப்பவன் கையில் ஓடு தரும்!
- உணவுக்குப் பதிலாய் நஞ்சைத் தரும்!
- பழியே புரியும் கொடியோன் புசிக்க
- பாலும் பழமும் தினம் தேடித் தரும்!
- பொருள்-இருந்தால் வந்து கூடும்!
- அதை இழந்தால் விலகி ஓடும்!(இது)
- மெய்யைப் பொய்யாய் மாற்றி விடும்!
- வீணே சிறையில் பூட்டி விடும்!
- பொய்யும் புரட்டும் நிறைந்தவன் தன்னைப்
- புகழ்ந்தே பாடல் புனைந்து விடும்!
- பொருள்-இருந்தால் வந்து கூடும்!
- அதை-இழந்தால் விலகி ஒடும்!
பாசவலை-1956
- இசை : எம். எஸ். விஸ்வநாதன், ராமமூர்த்தி
- பாடியவர் : C. S. ஜெயராமன்
- (பல்லவி)
- எல்லாம் திரை மறைவே--உலகில்
- எல்லாம் திரை மறைவே
- கல்வி இருந்தென்ன கற்பனை இருந்தென்ன
- கண்டு ரசிக்க கண்களில்லாதவர்க்கு
- (எல்லாம்)
- கற்றுக் கொடுக்காத கவி வாணரின் புலமை
- கஞ்சத் தனமுடையோன் காக்கும் பணப் பெருமை
- கவைக்குதவாப்படிப்பு உணர்ச்சியில்லா நடிப்பு
- கதிரவன் ஜோதி முன்னே குடத்தில் இட்ட விளக்கு
- (எல்லாம்)
- ஆடம்பரம் இல்லா அறிவாளி நாவன்மை
- அவனியை உருவாக்கும் தொழிலாளி கைவன்மை
- நாடிக்கடல் கலந்த நதிநீரின் நல்ல தன்மை
- நன்றியில்லா தவர்க்கு செய்த செய்த நன்மை
- (எல்லாம்)
பிறந்த நாள்-1982
- இசை: K. V. மகாதேவன்
- சொன்னாலும் கேக்காத உலகமுங்க!
- சொல்லாமப் போனாலும் புரியாதுங்க!-இதில்
- முன்னாலும் போகாமெ பின்னாலும் போகாமெ
- முழிக்கிற கும்பல் ஏராளங்க!
- சோம்பேறி ஆகுதுங்க!-சிலது
- தூங்காமத் தூங்குதுங்க!-புதுத்
- தொழிலைத் துவக்கிப் பலர்
- துயரத்தைத் தீர்க்காமெ
- துட்டுகளைப் பெட்டியிலே பூட்டுதுங்க!(சொ)
- பாடுபடும் ஏழைகளும்!-பணம்
- உள்ளவரும் சேர்ந்திடுங்க!-புதுப்
- பாதையை வகுத்திடுங்க!
- பங்கு போட்டுச் சாப்பிடுங்க!
- பாரபட்சமில்லாமெ வாழ்ந்திடுங்க!-என்று(சொ)
ஆடவந்த தெய்வம்-1960
- இசை: K. V. மகாதேவன்
- நம்ம சரக்கு ரொம்ப நல்ல சரக்கு!
- நாணயமும் நம்பகமும் உள்ள சரக்கு!
- ஸ்டாரு படம் போட்டிருக்கு பின்னாடி-இது
- சிறந்த பெல்ஜியம் கண்ணாடி!-நீ
- சிரிச்சா சிரிக்கும் அழுதா அழுவும்
- சிந்திச்சுப் பாரு இதன் முன்னாடி!
- அறிஞர் கலைஞர்கள் அருமைக் கவிஞர்கள்
- அறிவை உலகில் தரும் பேனா!-நல்ல
- இருதயமில்லாத மனிதருக்கு இது
- ஈட்டிமுனையாகும் சொல்லப் போனா!
- கெட்டதைப் பாக்காதே கேக்காதே பேசாதே!
- கேடுகெட்டுப் போகாதே மனக்குரங்கே!-அது
- கட்டுப்பாடு, கண்ணியம் கடமையைக் கொல்லுமின்னு
- வெட்ட வெளிச்சமாச் சொல்லுது இங்கே!
- இதோ பாரு தஞ்சாவூரு தலையாட்டி பொம்மை!
- இழுத்தபக்கம் சாயுறது இதனுடைய தன்மை!
- இதைப் போலச் சிலமனிதர் இருக்கிறதும் உண்மை!
- எண்ணிப் பார்த்தா அதுகளெல்லாம் நடமாடும் பொம்மை
தேடிவந்த செல்வம்-1958
- இசை: லிங்கப்பா
- எளியோர்க்கு சுகவாழ்வு ஏது?-துன்ப
- இருள் நீக்க ஆள்வோர் எண்ணாத போது!(எளி)
- திருநாடு தன்னில் திருவோடு ஏந்தி
- தெருவோடு போகும் நிலைமாறிடாது!
- சீமான்கள் உள்ளம் மாறாத போது!(எளி)
- எதுவந்தபோதும் விதிஎன்று எண்ணும்
- மதிகொண்ட மாந்தர் மனம் மாறிடாது
- நிதியோடு இன்பநிலை நேர்ந்திடாது !(எளி)
கனவு-1954
- இசை: S. தட்சிணாமூர்த்தி
(தொகையறா)
- உள்ளொன்று வைத்துப் புறம் ஒன்று பேசுவார்!
- உயர் பதவி காணுகின்றார்!
- உண்மையே பேசிடும் உத்தமர்கள் ஓயாத
- துயராலே வாடுகின்றார்!
பாட்டு
- புவி மீதினில் நீதி புகைந்ததே!
- பொய், பாபமும், சூதும் மலிந்ததே!
- பணப்பேயதன் முன்னே சட்டமெல்லாம்
- பணிந்தாடுதே இன்று பாரினிலே!
- கனல் மீதினில் புழுவாய் ஏழைகளே!
- கண்கலங்கியே வாடித் திண்டாடுறார்!
- அநியாயமிதே! அழியாததேன்?
- இதை அழித்திடுவாரே இல்லையா?
- பொதுமேடையில் ஏறிப் பேசுகிறார்-தாம்
- பொதுநலத் தொண்டன் என்கிறார்
- அதிகாரமும் கையில் வந்தவுடன்
- அநியாயமும் செய்கின்றார் கண்மூடியாய்!
- மனத்தூய்மையுடன் எல்லோருமே
- வாழ்ந்தால் அன்றி நிலையும் மாறுமோ?
- பாபமும் சூதும் மலிந்ததே!
- பாபம் மலிந்ததே! மலிந்ததே!
ராஜாம்பாள்-1951’'
- இசை: ஞானமணி
- உருளும் பணம் முன்னே!
- உலகம் அதன் பின்னே!
- தெரிந்து நட கண்ணே!
- திறமையுடனே!
- உல்லாசமும் சல்லாபமும்
- சொல்லாமலே தன்னால் வரும்!
- எல்லோரும் நம்மைக் கொண்டாடவே
- இல்லாத பெயர் எல்லாம் தரும்!
- உள்ளதைக் கோட்டை விட ஆளிருக்கும்போது!
- சில்லறைப் பஞ்சம் நம்ம கூட்டத்திற்கு ஏது?
- கண்ணாலே ஜாடை காட்டு!
- உன் கையைக் கொஞ்சம் நீட்டு!
- உன் எண்ணம் போல இன்ப வாழ்வு வந்து சேரும்!
- தள்ளாடும் கிழத் தாத்தாவுக்கும்
- துள்ளாட்டம் போட ஆசை வரும்!
- ஒய்யாரிகளின் நேசம் தரும்!
- மெய்யான சுகவாசம் பெறும்!
- கள்ளரை நல்லவரைப் போல அதுகாட்டும்!
- கண்ணியம் உள்ளவரைக் கூட அது வாட்டும்!
- என்னாளும் அதைத் தேடு!
- உன் சொந்தமாக்கிப் போடு!
- உன் எண்ணம்போல இன்பவாழ்வு வந்து சேருமே!
பொன்னு விளையும் பூமி-1959
- இசை: ரெட்டி
- ஆசையைக் கொன்றுவிடு!-இல்லையென்றால்
- ஆவியைப் போக்கிவிடு!
- பாசத்தை நீக்கிவிடு!-துன்பம் இல்லாப்
- பாதையைக் காட்டிவிடு!
- அந்தஸ்து பார்க்கும் கண்மூடி உலகம்!
- அன்பையும் பார்க்காது!-அதன்
- வஞ்சக நெஞ்சம் தெய்வீகக் காதலை
- வாழவும் வைக்காது!
- ஜாதியின் பேதம் சந்தர்ப்பவாதம்!
- காதுக்குக் கேட்காது! காதலின்கீதம்
- நாதமில்லாத வீணையும் ஆகி
- வாழ்வது ஏன் இங்கு? வாழ்ந்தது போதும்!
- வாழ்ந்தது போதும்! வாழ்ந்தது போதும்!
ஆடவந்த தெய்வம்-1960
- இசை: K. V. மகாதேவன்
- பாடியவர்: சீர்காழி கோவிந்தராஜன்
- விந்தையிலும் பெரிய விந்தையடி!-இது
- சிந்திக்க முடியாத எங்குமே காணாத
- (விந்தை)
- செந்தமிழ்ப் பண்பாட்டின் சிகரத்திலே
- சிறப்புடன் வாழும் இந்தக் குடும்ப நிலை!
- (விந்தை)
- பந்தபாசம் என்றால் படியென்ன விலையென்று
- தந்தையைப் பிள்ளை கேட்கும் காலமன்றோ!-இதில்
- அன்புடன் பெற்றவரின் அறுபதாம் ஆண்டுவிழா
- கொண்டாடும் குடும்பம் இதைப்போல உண்டோ?
- (விந்தை)
- வந்தமருமகளை நிந்தனை செய்வதையே
- வாடிக்கையாய்க் கொண்ட உலகினிலே
- மலர்ந்த முகங்காட்டி மருமகளைப் போற்றி
- மகளென்று பிறர் எண்ணும் வகையினிலே
- பாராட்டி சீராட்டிப் பழகிடும் மாமியும்
- பேறுகள் பதினாறும் பெற்ற இந்தக் குடும்பம்!
- (விந்தை)
படிக்காத மேதை -1960
- இசை : K. V. மகாதேவன்
- பாடியவர்: P. லீலா
:பெண்கள்: ஆனந்தமாய் இங்கு ஆடுவோமே-நம்மால்
- ஆகாததில்லையென்று பாடுவோமே-நாம்
- அழியாத புகழ் தன்னைத் தேடுவோமே-கற்பை
- அணியாக நாம் என்றும் சூடுவோமே-என்றும்
- (ஆனந்தமாய்)
- கண்ணகியின் மரபில் வந்த
- கன்னியர்கள் என்பதை நாம்
- எண்ணி எண்ணி இன்பம் கொள்வோமே!-பெண் குலத்தின்
- பெருமை தன்னை எடுத்துச் சொல்வோமே!
- கற்பெனும் தீயால்-பெரும்
- அற்புதம் செய்தாள்-அந்தப்
- பொற்கொடிபோல் வாழ்ந்திடுவோமே!-என்றும்
- (ஆனந்தமாய்)
- ஆஹா...
- அனுசூயை எனும் ஒரு பெண்ணாள்-அணையாத
- கற்பென்னும் சுடர் வீசும் கண்ணாள்!
- சிவனோடு ப்ரம்மாவை திருமாலை முன்னாள்
- சிசுக்களாக்கி அமுதம் அளித்த பெருமை சொல்வோமே-என்றும்
- (ஆனந்தமாய்)
- நாதனுயிர் காத்திடவே
- ஆதவனை மறைத்துவிட்ட
- மாதரசை மனதில் கொள்வோமே-நளாயினி
- மகிமைதனை எடுத்துச் சொல்வோமே!
- கற்பெனும் தீயால்-பெரும்
- அற்புதம் செய்தாள்-அந்தப்
- பொற்கொடிபோல் வாழ்ந்திடுவோமே!-என்றும்
- (ஆனந்தமாய்)
வண்ணக்கிளி-1959
- இசை : K. V. மகாதேவன்
- பாடியவர்கள்: P. சுசீலா & ஈஸ்வரி குழுவினர்
- வாழ்வு உயரவேண்டும்!-நாட்டின்
- வளமும் பெருகவேண்டும்!
- ஏழை எளியவர்க்கே!-உதவும்
- எண்ணம் பரவ வேண்டும்!
- பேத மகல வேண்டும்-மத
- பித்தம் நீங்க வேண்டும்-பொல்லா
- சூதும் வாதும் தொலைந்தே-தூய
- ஜோதி துலங்க வேண்டும்!
- மாதர் தம்மை யடிமை-செய்யும்
- வழக்கம் ஒழிய வேண்டும்!
- நீதி நிலவவேண்டும்!-எங்கும்
- நேர்மை உலவ வேண்டும்!-இன்ப
- (வாழ்வு)
ராஜாம்பாள்-1951
- இசை: ஞானமணி
- பொல்லாத உலகத்திலே நல்லதுக்குக் காலமில்லே!
- போலியெல்லாம் போடுதண்ணே கொண்டாட்டம்-இந்தப்
- போக்கு மாற செலுத்த வேணும் கண்ணோட்டம்!
- கள்ளர்களும் கயவர்களும்
- கண்ணியவான் போர்வையிலே
- கொள்ளையிட்டுப் பணத்தைச் சேத்துக் குவிப்பதா?
- நல்ல மனம் உள்ளவங்க
- சில்லறைகள் பார்வையிலே
- நாணய மில்லாதவராய்த் தவிப்பதா?
- (பொல்லாத)
- வெள்ளைசள்ளையிருந்தாத்தான் மதிப்பதா?-அது
- இல்லையின்னா காலில் போட்டு மிதிப்பதா?-இனி
- இந்தநிலை மாறிடவே இன்ப நிலை நேர்ந்திடவே
- ஒன்றுபட்டு உறுதியோடு உழைக்கணும்!
- (பொல்லாத)
- உள்ளபடி வயிறெரியும்.
- உதடு மட்டும் பழம் சொரியும்
- தில்லு முல்லு திருகு தாளக் கூட்டமே
- பல்லைக் காட்டிக்கிட்டு
- பாடிகார்டா சுத்திக் கிட்டு
- குல்லாப் போட்டு செய்யுது ஆர்ப்பாட்டமே
- (பொல்லாத)
- மொள்ளே மாறிக் கும்பல் குணம் மாறணும்-அதன்
- மூளையிலே சொறணை கொஞ்சம் ஏறணும்-அது
- நல்லபடி நடந்திடணும்!
- நம்ம நிலை உயர்ந்திடணும்
- நல்லவங்க அதுக்கு நாளும் உழைக்கணும்!
- (பொல்லாத)
நான் சொல்லும் ரகசியம்-1959
- இசை : G. ராமநாதன்
- பாடியவர்: T. M. சௌந்தரராஜன்
- திருவிளக்கு வீட்டுக்கு அலங்காரம்!
- திருமாங்கல்யம் பெண்களுக்கு ஜீவாதாரம்!
- (திரு)
- திருவிழா ஊருக் கெல்லாம் சிங்காரம்-நம்
- திருநாட்டின் பெருமைக்கு இதுவேதான் ஆதாரம்!
- (திரு)
- "இல்லறமே நல்லறமாய் வாழுங்க"-என்ற
- வள்ளுவரை வாசுகியைப் பாருங்க!
- தெள்ளமுதாம் நீதிமொழி தன்னையே-நமக்கு
- அள்ளித் தந்த பாட்டி இந்த ஔவையே!
- (திரு)
- சதிபதிகள் இணைந்தது சம்சாரமே!-அதில்
- தனிமை வந்தால் இன்பநிலை மாறுமே!-எனும்
- தத்துவத்தைச் சொன்ன வேதநாயகன்!-சொல்லின்
- நித்தியத்தை உணரவேணும் யாருமே!
- (திரு)
மனமுள்ள மறுதாரம்-1958
- இசை : K. V. மகாதேவன்
- பாடியவர்: P. சுசிலா
- ஜிங்காலே ஜிங்காலே ஜிங்காலே
- ஜிங்காலே ஜிங்காலே ஜிங்காலே
- (ஜிங்)
- ஆண் } அத்திப்பயத்தை பாக்கப் பாக்க அயவுதான்! ::::::::::::ரொம்பஅயவுதான்!
- பெண்} புட்டுப் பாத்தா உள்ளே அல்லாம் புயுவுதான்!
- அல்லாம் புயுவுதான்!
- ஆண் : சுத்த மிண்ணு சொல்லுறது
- சுத்திக்கிற துணியிலில்லே!
- தோலு நெறத்திலில்லே!
- காசு பணத்திலில்லே!
- பெண்: மெத்தப் படிச்சவன் பேச்சிலில்லே!
- மேனாமினுக்கிப் பூச்சிலில்லே!
- மத்தவனை மதிக்கத் தெரிஞ்ச
- மனசுலதான் இருக்கு சாமி!
- (ஜிங்)
- ஆண் : நாலு பேரு மத்தியிலே நாகரீக சாயப்பூச்சு!
- நல்லவங்க மாதிரியா நாணயமான பேச்சு!
- பெண் : களவாணி கூட்டத்துக்கு ஏஞ்சாமி வாய்வீச்சு!
- காலம் இப்போ சத்தியமா ரொம்ப ரொம்ப கெட்டுப்போச்சு!
- (ஜிங்)
டில்லி மாப்பிள்ளை-1968
- இசை: K. V. மகாதேவன்
- இருந்தும் இல்லாதவரே- எல்லாம்
- இருந்தும் இல்லாதவரே-அவர்கள்
- இருப்பது உண்மையில் பெருந்தவறே-உலகில் (இருந்)
- செல்வம் இருந்தென்ன? சிறப்புகள் இருந்தென்ன?
- கள்ளமில்லா உள்ளம் இல்லாதவர் எல்லாம் (இருந்)
- மணக்கும் ஜாதி மல்லி மலரைத் தள்ளி-கண்ணைப்
- பறிக்கும் காகிதப்பூ வாங்குவோர்-வெளி
- அழகில் ஆசை கொண்டு ஏங்குவோர்
- மலர் விட்டு மலர் தாவி மது வுண்ணும் வண்டாகி
- மனநிலை தடுமாறி வாழ்ந்திடுவோர் எல்லாம் (இருந்)
கொங்கு நாட்டு தங்கம்-1961
- இசை : K. V. மகாதேவன்
- பாடியவர்: P. சுசிலா
- சமாதானமே தேவை ...
- அந்த சன்மார்க்கம் தழைத்திடச் செய்வோம் சேவை
- அமைதியாக நாம் வாழ்ந்திடவே
- அன்பும் அறமும் வளர்ந்திடவே
- சமரசப் பாதை தோன்றிடவே
- சாந்தியும் இன்பமும் சூழ்ந்திடவே
- (சமாதான)
- சாந்தியும் இன்பமும் சூழ்ந்திடவே
- போட்டிப் பொறாமைகள் இல்லாத-ஒரு
- புதிய சமுதாயம் உருவாக-புத்தர்
- காட்டிய வழியில் நாம் போக-அவர்
- கண்ட கனவுகள் நனவாக
- (சமாதான)
- கண்ட கனவுகள் நனவாக
- கட்சி பேதங்கள் எதற்காக?-பல
- கலகமும் பகையும் எதற்காக?
- ஒற்றுமையால் நாம் உயர்ந்திடுவோம்!
- ஒரே கட்சியாய் இருந்திடுவோம்!
- (சமாதான)
- ஒரே கட்சியாய் இருந்திடுவோம்!
மருத நாட்டு வீரன்-1961
- இசை : S. V. வெங்கட்ராமன்
- பாடியவர்: T. M. சௌந்தரராஜன்
- பாட்டு
- வணக்கம் வணக்கம் ஐயா, அம்மா உங்க அபயம்!
- அணைக்கும் கையால் தள்ளாதீங்க இந்தச் சமயம்!
- (வண)
- வாயிருக்கு எங்களுக்கும் வயிறிருக்கு!
- வாட்டுகின்ற பசிப்பிணி துயரிருக்கு!
- வாழுவது உங்க கையில் தானிருக்கு!
- (வண)
- பற்றிப் படர வந்த பசுங்கொடியைப்
- பந்தலே தள்ளுவதும் சரியா?
- பெற்றவர்கள் தங்கள் பிள்ளைகள் குறைகளைப்
- பெரிதாய்க் கொள்ளுவதும் முறையா?
- (வண)
- (கெஜல்)
- அண்ட நிழல் தேடிவரும் நொண்டிகளை ஆலமரம்
- அடித்தே விரட்டுவதும் உண்டோ?
- வந்தவரை வாழ வைக்கும் வசதி படைத்தவங்க
- தண்டனைகள் தருவதும் நன்றோ?
- பாட்டு
- கண்ணிருக்கு உங்களுக்குக் கருத்திருக்கு!
- கையேந்தும் எங்கநிலை தெரிஞ்சிருக்கு!
- கடவுளும் நீங்க தான் எங்களுக்கு!
- (வண)
மாடப்புறா-1962
- இசை : K. V. மகாதேவன்
- பாடியவர் : P. சுசிலா
- எங்குமே சுத்துவோம் இஷ்டம் போலே!
- எங்களில் கட்சியால் சண்டை இல்லே!
- ஏய்ப்பவரில்லே-ஏழையுமில்லே-ஏனென்றால் பணமில்லே!
- (எங்)
- தங்கவோ ஓரிடம் சொந்தமும் இல்லே !
- சட்டமும் திட்டமும் எங்க கூட்டத்துக்கில்லே!
- ஜாதியுமில்லே! பேதமுமில்லே! ஏனென்றால் படிப்பில்லே!
- (எங்)
- கூப்பனோ ரேஷனோ வாங்குவதில்லே!
- காப்பியும் டிபனும் நாங்க கண்டதுமில்லே!
- காய்ச்சலுமில்லே! டாக்டருமில்லே!
- ஏனென்றால் அது இல்லே! எங்களுக்கு அது இல்லே!
- (எங்)
- ஏட்டிலே எங்க பேர் காட்டவுமில்லே!
- ஓட்டுகள் போடவும் இன்னும் உரிமையு மில்லே!
- கேட்டதுமில்லே! தந்ததுமில்லே!
- ஏனென்றால் பலனில்லே!
- (எங்)
ஜமீன்தார்-1952
- இசை : G. ராமநாதன்
- பாடியவர் : ஜிக்கி
- கெஜல்
- அறிவிருந்தும் ஆராய்ந்து பாராமலே!
- அன்பிருந்தும் அதன் குரலைக் கேளாமலே!
- அணைகடந்த காட்டாற்று வெள்ளம் போலே!- மனதிலே!
- ஆவேசம் கொண்டதாலே!
- பாட்டு
- கோபம் உண்டானதே! ஒன்றாய்க் கலந்தே
- குலாவிய குடும்பம் ரெண்டானதே!-முன்
- (கோபம்)
- கெஜல்
- தன்னலம் கண்களை மறைத்ததாலே
- தன் தவறைத் தான் உணரா நிலையினாலே!
- தனக்கு ஒருநீதி! பிறர்க்கு ஒருநீதி என்று
- தர்மநெறி முறைதவறி நினைத்ததாலே!
- பாட்டு
- அமுதையும் நஞ்சாக வெறுத்திடுதே!
- அன்பெனும் வலையை அறுத்திடுதே!
- அமைதி இல்லாமல் அலைந்திடுதே!
- இவையாவும் முருகா உன் லீலையா?
- (கோபம்)
வாழவைத்த தெய்வம்-1959
- இசை : K. V. மகாதேவன்
- சுயநலம் பெரிதா?
- பொது நலம் பெரிதா?-இந்த
- சொல்லின் உண்மை தன்னை எண்ணிப் பாரடா
- மதி மயக்கத்திலே
- வரும் தயக்கத்திலே
- மனம் தடுமாறித் தவிக்கும் மனிதா-இந்த
- சொல்லின் உண்மை தன்னை எண்ணிப் பாரடா!
- (சுயநலம்)
- துன்பம் இல்லாமலே
- இன்பம் உண்டாகுமா?
- அன்பு இல்லாத
- இதயம் இதயமா?
- நல்ல தேமாங்கனி
- என்றும் வேம்பாகுமா-இந்த
- சொல்லின் உண்மை தன்னை எண்ணிப்பாரடா
- (சுயநலம்)
- நாம் தேடாமலே வந்த
- செல்வம் என்றால்
- அதைத் தெரு மீது
- வீணே எறிவதா?
- தென்றல் புயலாவதா?-உள்ளம்
- தீயாவதா? இந்த
- சொல்லின் உண்மை தன்னை எண்ணிப்பாரடா
- (சுயநலம்)
யார் பையன்-1957
- இசை : S, தட்சிணாமூர்த்தி
- ஜரிகைப் பட்டு சலசலக்க
- சாந்துப் பொட்டு பளபளக்க
- புருஷன் மனசு கிறுகிறுக்க
- புதுக் குடித்தனம் நடத்தப் போற
- கல்யாணப் பொண்ணே!
- கல்யாணப் பொண்ணே!
- கவனம் வையடி!
- வரவுக் கேத்த செலவு பண்ணும்
- வழி மொறையைத் தெரிஞ்சுக்கோ!
- மாமன் மாமி நாத்தி மனம்
- கோணாமலே நடந்துக்க
- புருஷன் குணம் போற போக்கு
- நடத்தைகளைப் புரிஞ்சுக்க!
- புத்தியோடு நடந்து நல்ல
- பேரும் புகழும் தேடிக்க!
- (கல்)
- பேரும் புகழும் தேடிக்க!
- அரச்சு மஞ்சளைக் கொழச்சு முகத்தின்
- அழகு வளரப் பூசிக்க!
- சிரிச்ச முகம் சீதேவியா
- இனிக்க இனிக்கப் பேசிக்க!
- அசட்டையாக இல்லாமலே
- அலுவல்களைப் பார்த்துக்க!
- அடக்க ஒடுக்கம் அன்பையும் உன்
- அருந் துணையா சேத்துக்க!
- (கல் )
- அருந் துணையா சேத்துக்க!
- கண்ணகி போல் பேரெடுக்க
- கற்பு நெறியைக் காத்துக்க! ஆனா
- கணவன் வேறு மாதவியைத்
- தேடிக்காமெ பாத்துக்க!
- பொண்ணு புள்ள ரெண்டு ஒண்ணை
- சிக்கனமாப் பெத்துக்க!
- புட்டிப் பாலு தய வில்லாமெ
- கச்சிதமா வளர்த்துக்க!
- (கல்)
- கச்சிதமா வளர்த்துக்க!
சமயசஞ்சீவி - 1957
- இசை : G. ராமநாதன்
- வெள்ளிப் பணத்துக்கும்
- நல்ல குணத்துக்கும் வெகுதூரம்-இது
- உள்ளபடி இந்த உலகம் உணர்த்தும்
- ஒரு பாடம்!
- (வெள்ளி)
- ஒரு பாடம்!
- பிள்ளை யெனும் பந்த பாசத்தைத் தள்ளிப்
- பிரிந்தோடும்-தன்
- உள்ளத்தை இரும்புப் பெட்டகமாக்கித்
- தாள் போடும்!
- இல்லாதவர் எவரான போதிலும்
- எள்ளி நகையாடும்-இணை
- இல்லாத அன்னை அன்புக்குக் கூட
- சொல்லாமல் தடை போடும்
- (வெள்ளி)
- சொல்லாமல் தடை போடும்
- வெள்ளத்தினால் வரும் பள்ள மேடு போல்
- செல்வம் வரும் போகும்-இதை
- எள்ளளவேனும் எண்ணாத கஞ்சர்க்குத்
- துன்பம் வரவாகும்!
- கள்ள மில்லாத அன்புச் செல்வமே
- என்றும் நிலையாகும்!
- கஷ்டம் தீரும் கவலைகள் மாறும்
- இன்பம் உருவாகும்!
- (வெள்ளி)
- இன்பம் உருவாகும்!
சபாஷ் மாப்பிளே - 1961
- இசை : K. V. மகாதேவன்
- நான் சொல்லும் ரகசியம்
- கண் காணும் அதிசயம்
- நன்றாக எண்ணிப் பாருங்க
- இதை அவசியம்-அவசியம்-அவசியம்
- (நான்)
- இதை அவசியம்-அவசியம்-அவசியம்
- உணவுக்கு ஒரு கும்பல்
- போராடும் வேளையில்
- பதவிக்கு ஒரு கும்பல்
- போராட்டம் நடத்துது!
- ஒய்வில்லா வேலையால்
- உசுரை விடும் ஏழையின்
- உழைப்பாலே ஒரு கும்பல்
- உல்லாசம் தேடுது!
- (நான்)
- உல்லாசம் தேடுது!
- கல்யாணம் செய்யவே
- சிங்காரப் பந்தலும்
- கச்சேரி சதுராட்டம்
- ஊர்வலமும் வேணுமா?-இவை
- இல்லாமல் எவரேனும்
- கல்யாணம் பண்ணினால்
- இன்பசுகம் பிள்ளை குட்டி
- இல்லாமல் போகுமா!
- (நான்)
- இல்லாமல் போகுமா!
- தங்க நகை வைர நகை
- சரஞ்சரமாய்த் தொங்கினால்
- மங்காத அழகு வரும்
- என்று எண்ணும் பெண்களே!
- பங்கம் வரும் திருடர்களும்
- பார்த்து விட்டால் இவைகளைப்
- பறித்திடுவார் அப்பொழுது
- கலங்காதோ கண்களே!
நான் சொல்லும் ரகசியம்-1959
- இசை : G. ராமநாதன்
- பாடியவர் : T. M. சௌந்தரராஜன்
- பார்க்காத புதுமைகளெல்லாம்
- கண்ணாரப் பாரடி பொம்மி!
- கேட்காத சங்கதி யெல்லாம்
- காதாரக் கேளடி பொம்மி!
- ஆம்பளெ வந்து ஆடிப்பாடினா
- அவனுக்கு பைசா கெடைக்காது!
- அழகுப் பொம்பளெ ஆடிப்பாடினா
- அதுக்குக் கெடைக்குது பணம் காசு!
- அரும்பு மீசையில் கையைப் போடுது
- அங்கே பாரு! ஒரு கேசு!
- குறும்பாப் பாத்துப் பல்லை இளிக்குது
- கூறு கெட்ட ஒரு முண்டாசு!
- (பார்க்காத)
- கூறு கெட்ட ஒரு முண்டாசு!
- தெருவுக்குத் தெருவு சந்திக்கு சந்தி
- டிங்கி அடிக்கிற ஒரு கூட்டம்!
- இருக்கிற இருப்பெ பொழப்பையும் மறந்து
- இங்கு செய்யுமாம் ஆர்ப்பாட்டம்
- வரவுக்கு மிஞ்சி செலவுகள் பண்ணி
- மஜா தேடுற ஒரு கூட்டம்
- இரவு ராணிகள் வலையில் விழுந்து
- ஏங்கி நிக்குமாம் குரங்காட்டம்!
- (பார்க்காத)
- ஏங்கி நிக்குமாம் குரங்காட்டம்!
- பரபரப்பாக இருக்கிற சமயம்
- பாக்கட் அடிப்பான் கில்லாடி!
- இருக்கிற காசைப் பறி கொடுத்தவனோ
- ஏங்கித் தவிப்பான் தள்ளாடி!
- சுறு சுறுப்பாக இருக்கற இடத்தில்
- தூங்கியே வழிவான் சோம்பேறி!
- சொன்னதை எல்லாம் மனசுலேவச்சு
- நடந்துக்க வேணும் அம்மாடி!
- (பார்க்காத)
- நடந்துக்க வேணும் அம்மாடி!
நான் சொல்லும் ரகசியம்-1959
- இசை : G. ராமநாதன்
- பாடியவர் : P. சுசிலா
- சாமி சாமி என்று ஊரை ஏய்க்கின்ற-ஆ
- சாமி ரொம்ப இந்த நாட்டிலே!-ஒரு
- சாண் வயித்துக்காக ஆண்டவன் பேரையும்
- சந்திக்கிழுக்கிறாங்க பாட்டிலே-ஏ சாமியோ!-நடு
- சந்திக்கிழுக்கிறாங்க பாட்டிலே!
- (சாமி)
- தாடிசடைமுடி தண்டு கமண்டலம்
- கொண்டவனெல்லோரும் சாமி!-நல்லாப்
- பாடுபட விரும்பாத திருவோட்டுப்
- பரதேசிப் பயல்களும் சாமி!
- கூடுபொய் வீடுபொய் குடும்பம் பொய் எனப்பாடும்
- கேடுகெட்டவன் ஒரு சாமி!
- தன்குட்டு மறைய வேடம் கட்டிக் கடவுள் பெயர்
- குரைக்கும் நாயும் ஒரு சாமி!-இப்படி
- (சாமி)
- கட்டின பெண்டாட்டிதனை விட்டுவிட்டு ஓடிவந்த
- கையாலாகாதவனும் சாமி!
- கடனைவாங்கித் திருப்பித்தரமுடியாத காரணத்தால்
- காஷாயம் உடுத்தவனும் சாமி!
- சுட்ட திருநீறு பூசித் துந்தனாவை மீட்டி வரும்
- துடுக்கனும் கூட ஒரு சாமி!
- விட்டெறிந்த எச்சிலையை வீதியில் பொறுக்கித்தின்னும்
- கிறுக்கனும் கூட ஒரு சாமி! இப்படி
- (சாமி)
- கிறுக்கனும் கூட ஒரு சாமி! இப்படி
- ஆருக்குந் தெரியாமல் பஞ்சமா பாதகம்
- அஞ்சாமல் தினம் செய்து
- ஊருக்கு நீதியை உபதேசம் செய்யும் -
- உலுத்தப் பயலும் ஒரு சாமி!
- ஆருக்கும் குடியல்லோம் அஞ்சோம் நமனை என்று
- ஆர்ப்பாட்டம் செய்து
- நேருக்குநேர் வெறும் நிழலைக் கண்டு நடுங்கும்
- நீசப் பயலும் ஒரு சாமி!
- கஞ்சாக் குடிப்பவனும் சாமி!-கடவுளைக்
- கண்டதாய்க் கதைப்பவனும் சாமி!
- காமியெல்லாங் கூட இங்கே சாமி!-பணம்சேர்க்கக்
- கயிறு திரிப்பவனும் சாமி!
- எத்தனெல்லாம் சித்தன்!
- ஏமாறுபவன் பக்தன்!
- ரோஹியெல்லாம் யோகி!
- பைராகி பெரும் தியாகி!
ராஜராஜன்-1957
- இசை : K. V. மகாதேவன் -
- பாடியவர் : T. M. சௌந்தரராஜன்
- (தொகையறா)
- பாடுபட்டுத் தேடிப் பணம் குவித்து
- மாடிமனை நிலபுலன்கள் வாங்கி வைத்து
- வாழ்வதனால் சுகபோகம் வந்திடுமோ?
- மாறாத மன நிறைவு தந்திடுமோ?
- (பாட்டு)
- இருப்பவர்கள் அனுபவிக்க
- இருக்குது பல இன்பமே!-பணம்
- இருப்பவர்கள் அனுபவிக்க
- இருக்குது பல இன்பமே!
- இதையுணர்ந்து அதை அறிந்து
- சுகிக்க வேணும் என்றுமே!
- (இருப்பவர்கள்)
- (தொகையறா) .
- தேவைக்கு மேல் பொருளைச் சேர்த்து வைத்துக் காப்பவரே!
- ஆவிபோனபின் அதனால் என்ன பலன் சொல்வீரே!
- (பாட்டு)
- காலனும் வரும் முன்னே கண்ணிரண்டும் மூடுமுன்னே
- வாலிபம் வாழ்வில் தோன்றி வான வில்லாய் மறையு முன்னே
- வண்டாக ஆடிப்பாடி உலகிலே
- (இருப்பவர்கள்)
- (தொகையறா)
- என் அங்க நிறத்திற்குத் தங்கமும் ஈடாமோ?
- பொங்கும் விழிப்பார்வைக்குப் புதுவைரம் இணையாமோ?
- குங்கும இதழுக்குச் செம்பவழம் நிகராமோ?
- கோடானுகோடி பொருள் ஒரு கொஞ்சு மொழி சுவைதருமோ?
- (பாட்டு)
- செங்கரும்புச் சாறெடுத்து தேனுடனே அதைச் சேர்த்து
- சிங்கார ரசமளிப்போம் தேடியாரும் வரும் போது!
- திகட்டாத இனிமை தந்து வாழ்விலே!
- (இருப்பவர்கள்)
நாலு வேலி நிலம்-1959
- இசை : K.V. மகாதேவன்
- பாடியவர்: P. சுசிலா
- புதிய வாழ்வு பெறுவோம்!-மதியினால்
- விதியை வெல்ல முயல்வோம்!
- கெதியை நொந்திடாமல்-காலக்
- கெதியை நொந்திடாமல்
- கடமையைச் செய்வோம்!
- (புதிய)
- உழவைப் போற்றி வளர்ப்போம்!-சகல
- உயிர்க்கும் உணவு அளிப்போம்!
- பஞ்சப் பிணியைத் தொலைப்போம்!-சமதர்மப்
- பாதை தன்னை வகுப்போம்!
- (புதிய)
- எழுத்தறிவில்லார் என்பவரே-இங்கே
- எவருமில்லாமல் செய்திடுவோம்!
- பகுத்தறிவாளர் பாசறையாய்ப்
- பாரில் நம் நாட்டை ஆக்கிடுவோம்!
- (புதிய)
- இந்த நாட்டின் எதிர்காலம்
- இளைஞர்கள் கையில் இருப்பதாலே-அவர்களை
- வளர்க்கும் மாதர் அறிவே வளர்ந்திடும்
- மார்க்கம் காணச் செய்வோம்!
- (புதிய)
அமரகவி-1952
- இசை : G. ராமநாதன்
- பாடியவர்: M.K. தியாகராஜபாகவதர்
- கண்ணைப் போல தன்னைக் காக்கும்
- அன்னை தந்தையே-உணர்ந்து
- சொன்ன சொல்லைப் போற்ற வேணும்:
- தூய சிந்தையே-இதுவே அறிவுடமை!
- ஒரு கன்னியின் கடமை! -
- முன்னும் பின்னும் எண்ணிப் பார்த்து
- நடந்திட வேண்டும்!
- கண்ணை, காதை வாயை அடக்கும்
- தன்மையும் வேண்டும்!
- பொன்னில், பொருளில் ஆசையின்றி
- இருந்திட வேண்டும்!
- போது மென்ற மனதுடனே!
- மகிழ்ந்திட வேண்டும்
- இதுவே அறிவுடமை!
- ஒரு கன்னியின் கடமை!
- அடங்கி ஒடுங்கி அன்பு காட்டும்
- பண்பில்லாது-பூணும்
- அணி மணியால் வந்து சேரும்
- அழகு நில்லாது!
- தொடர்ந்து துன்பம் வந்த போது
- துணிவுயில்லாது-தங்கள்
- குடும்பப் பெயரைக் குலைக்கும் முறையில்
- நடக்கக் கூடாது!
- இதுவே அறிவுடமை!
- ஒரு கன்னியின் கடமை!
- புன்னகையைப் பொன்னகையாய்ப்
- போற்றிட வேண்டும்-நல்ல
- புத்தி சாலி என்னும் பெயரை
- ஏற்றிட வேண்டும்
- கண்ணகி போல் கற்பு நெறி
- காத்திட வேண்டும்!
- பணக்காரப் பெண்கள் கூட்டுறவை
- விலக்கிட வேண்டும்!
- இதுவே அறிவுடமை
- ஒரு கன்னியின் கடமை
நான் சொல்லும் ரகசியம்-1959
- இசை: G. ராமநாதன்
- வாழ்க நமது நாடு!
- வளரும் அன்பினோடு!
- சூழ்க என்றும் நல்லறங்கள்
- என்று சொல்லிப் பாடு!
- வானம் பெய்து நாட்டிலே
- வளம் நிறைந்து வீட்டிலே
- மாசில்லாத இன்பம் பொங்கி
- மக்கள் வாழ்க்கை ஏட்டிலே
- தேர்ந்த கல்வி ஞானம்
- செல்வம் சேர வேணும்!
- தேசமெங்கும் தேனும் பாலும்
- பெருகி ஓட வேணும்
- (வாழ்க)
- சண்டையின்றி யாவரும்
- ஒன்று பட்டு வாழுவோம்!
- அண்டை நாட்டு மக்கள் தம்மை
- அன்பினாலே வெல்லுவோம்!
- நெஞ்சில் நேர்மை ஈரம்
- அஞ்சிடாத வீரம்!
- சொந்தங் கொண்டு வள்ளலாக
- வாழவேணும் யாரும்!
- (வாழ்க)
- நீதியுள்ள ஆட்சியே
- நிலவுகின்ற மாட்சியே
- யாருங்காண நமது நாடு
- ஆக வேணும் சாட்சியே!
- ஏழை என்ற சொல்லே
- இந்த நாட்டில் இல்லை
- என்று யாரும் சொல்ல நாமும்
- செய்ய வேணும் சேவையே!
- (வாழ்க)
சாரங்கதரா-1958
- இசை: G. ராமநாதன்
- பாடியவர்: T.M. சௌந்தரராஜன்
- (தொகையறா)
- விளக்கினைப் பழம் என்று கருதியே ஏமாந்து
- விட்டிலும் விழுவதேனோ? ஆண்களின்
- வெளி வேஷப் பேச்சிலே மயங்கியே பெண்கள்
- எனைப் போல் நலிவதேனோ?
- (பாட்டு)
- சிந்திக்கும் தன்மையற்றதாலா? அல்லது முன்
- ஜென்மத்தில் செய்த வினையாலா? இன்பம் தனை
- துன்பம் தொடரும் என்பதாலா? உலகமே
- சூதின் வடிவம் என்பதாலா
- (சிந்)
- (தொகையறா)
- சதி செய்யும் சுய நலக் கும்பலாய் ஆண்களும்
- தரணியிலிருப்ப தேனோ?
- தங்கள் மனம் போலவே தாய்க்குலம் தன்னையே
- வீணாக வதைப்ப தேனோ?
- (பாட்டு)
- நம்பிடும் பெண்கள் உள்ளதாலா?-உலகிலே
- நயவஞ்சகம் மலிந்ததாலா?
- தெம்பில்லாப் பேதை என்பதாலா?-சிலரிங்கே
- தெய்வமே இல்லை என்பதாலா?
- (சிந்)
சமய சஞ்சீவி-1957
- இசை: G. ராமநாதன்
- அழகான பொண்னு நான்!
- அதுக் கேத்த கண்ணுதான்
- எங்கிட்ட இருப்ப தெல்லாம்
- தன்மானம் ஒண்ணு தான்!
- (அழகான)
- தன்மானம் ஒண்ணு தான்!
- ஈடில்லா காட்டு ரோஜா
- இதெ நீங்க பாருங்க!
- எவரேனும் பறிக்க வந்தா
- குணமே தான் மாறுங்க!
- முள்ளே தான் குத்துங்க!
- ஓ.......அங்கொண்ணு சிரிக்கிது!
- ஆந்தை போல் முழிக்கிது!
- ஆட்டத்தை ரசிக்க வில்லை!
- ஆளைத்தான் ரசிக்குது!
- (அழகான)
- ஆளைத்தான் ரசிக்குது!
- இங்கொண்ணு என்னைப் பாத்து
- கண் ஜாடை பண்ணுது!
- ஏமாளிப் பொண்ணுயின்னு
- ஏதேதோ எண்ணுது!
- ஏதேதோ எண்ணுது!
- ஓ ... பெண்சாதியெத் தவிக்க விட்டு
- பேயாட்டம் ஆடுது!
- பித்தாகி என்னச் சுத்திக்
- கைத் தாளம் போடுது!...
- (அழகான)
- கைத் தாளம் போடுது!...
அலிபாபாவும் 40 திருடர்களும்-1955
- இசை : S. தட்சிணாமூர்த்தி
- பாடியவர்: P. பானுமதி