குழந்தைச் செல்வம்/இலக்கிய மும்மணி

by கவிமணி தேசிக விநாயகம் பிள்ளை

41. இலக்கிய மும்மணி

வள்ளுவர் தந்த திருமறையைத் - தமிழ்
      மாதின் இனிய உயிர்நிலையை
உள்ளம் தெளிவுறப் போற்றுவமே - என்றும்
      உத்தம ராகி ஒழுகுவமே. 1

பாவின் சுவைக்கடல் உண்டெழுந்து - கம்பன்
      பாரிற் பொழிந்ததீம் பாற்கடலை
நாவின் இனிக்கப் பருகுவமே - நூலின்
      நன்னயம் முற்றுந் தெளிகுவமே. 2

தேனிலே ஊறிய செந்தமிழின் - சுவை
      தேரும் சிலப்பதி காரமதை
ஊனிலே எம்முயிர் உள்ளளவும் - நிதம்
     ஓதியுணர்ந்தின் புறுவோமே. 3