குழந்தைச் செல்வம்/கைத்திறன்
32. கைத்திறன்
வெயில்வரினும் மழைவரினும் விரிகுடையாம் கையே;
வெயர்வைவரின் ஆற்றுசிறு விசிறியதாம் கையே
துயிலவொரு மகவைத்தொட்டில் இட்டசைக்கும் கையே;
துரிதமுடன் எழுதவொரு தூவிகொளும் கையே.
1
இனியசெந்நெற் புலம்உழுதற் கேர்பிடிக்கும் கையே;
இன்னிசைகள் எழுப்பவீணை ஏந்துமெழிற் கையே;
கனியுதிர்ப்பக் கல்லெறியும் கவண்பிடிக்கும் கையே ;
கண்களிப்பப் படமெழுதிக்காட்டும்என் றன்கையே.
2
தானதர்மம் செய்ய எதும் தளர்விலதாம் கையே;
தளர்பவரைக் கண்டுதலை தாங்கஎழும் கையே;
பானம்செய்தற் கேற்றவொரு பாத்திரமாம் கையே ;
பையரவைப் போலவந்து பயமுறுத்தும் கையே.
3
மலரெடுத்து நல்லசெண்டு மாலைகட்டும் கையே ;
வாய்க்கினிய பண்டமெலாம் வைத்துதவும் கையே ;
சலமதனில் ஓடம் விடச் சலிப்பிலதாம் கையே ;
தரையில் மோட்டார், ரயில் நடத்தச் சமர்த்துளதாம் கையே.
4
கோபுரம்சேர் கோயிலொடு குடிசை கட்டும் கையே ;
குளங்கிணறு குட்டையெலாம் குழித்துதவும்கையே
ஆபரணம் பணிமணிகள் ஆய்ந்துசெய்யும் கையே;
ஆடைகள்பா வாடைகளும் ஆக்குமெழிற் கையே;
5
மல்லயுத்தம் செய்வதற்கு வந்துநிற்கும் கையே;
வாள்பிடித்து வகைவகையாய் மரம் அறுக்கும் கையே;
நெல்லைக்குத்தும் அரிசிதீட்டும்; நொய்கொழிக்கும் கையே
நேயரொடு பாண்டியாடி நிதம்ஜெயிக்கும் கையே.
6
நாடியசீர் நாட்டைய ராட்டுருட்டும் கையே;
நல்லகதர் நெய்யமிகு வல்லமைகொள் கையே;
பாடியவாய் தேனூறும் பாரதியார் பாடல்
பண்ணமையப் பாடுதற்குப் பாணிகொட்டுங்கையே.
7
அழைப்பதற்கும் அகற்றுதற்கும் அபிநயிக்கும் கையே ;
ஆக்குதற்கும் அழிப்பதற்கும் ஆற்றல்பெறும் கையே;
உழைப்பதற்கும் ஊட்டுதற்கும் ஊக்கமுறும் கையே;
உதவுதற்கும் ஏற்பதற்கும் உரிமைகொளும் கையே.
8
மக்களைத்தம் ஒக்கல்வைத்து வளர்த்திடுமென் கையே ;
வண்ணமலர் தலைக்கணிந்து வாசமூட்டும் கையே ;
தக்கபெரி யோர்க்குமிகத் தான்வணங்கும் கையே;
தரணியிலுன் திறமையெலாம் சாற்றல் எளிதலவே.
9