குழந்தைச் செல்வம்/நாட்டுக்கே உழைப்போம்

by கவிமணி தேசிக விநாயகம் பிள்ளை

57. நாட்டுக்கே உழைப்போம்

நெற்றி வியர்வை நிலத்தில் விழஉழைப்போம்;
பெற்ற சுதந்திரத்தைப் பேணுவோம்; சுற்றமெனப்
பன்னாட்டு மக்களையும் பாராட்டிப் பாரதமா
நன்னாட்டில் வாழுவோம் நாம். 1

பத்தியொடு தெய்வம் பணிந்திடுவோம்; பாரதத்தாய்
சித்தம் களிப்படையச் செய்திடுவோம்; ஒத்துழைத்துப்
பெற்ற சுதந்திரத்தைப் பேணிடுவோம்; பேருலகில்
நற்றவம் ஈதால் நமக்கு. 2

வாணிகம் செய்வோம்; வயலிற் பயிர் செய்வோம் :
காணரிய கைத்தொழிலும் கண்டு செய்வோம்; பேணிநம்
சந்தத் தமிழ்வளர்ப்போம்; தாய் நாட்டுக்கே உழைப்போம்;
சிந்தை மகிழ்ந்து தினம். 3