குழந்தைச் செல்வம்/வெண்ணிலா
22. வெண்ணிலா
மீன்கள் கோடி கோடிசூழ, வெண்ணிலாவே! - ஒரு
வெள்ளியோடம் போலவரும் வெண்ணிலாவே !
1
பானுவெங் கதிர்குளிக்கும் வெண்ணிலாவே! - நித்தம்
பாற்கடலும் ஆடுவையோ? வெண்ணிலாவே!
2
ஆம்பல்களி கூரவரும் வெண்ணிலாவே! - உனக்கு
அம்புயம்செய் தீங்கெதுவோ? வெண்ணிலாவே!
3
இரவையும்நண் பகலாக்கும் வெண்ணிலாவே! - உன்னை
இராகுவும் விழுங்கிடுமோ? வெண்ணிலாவே!
4
வளர்ந்து வளர்ந்துவந்த வெண்ணிலாவே! - மீண்டும்
வாடிவாடிப் போவதேனோ? வெண்ணிலாவே!
5
கூகை ஆந்தை போலநீயும், வெண்ணிலாவே! - பகல்
கூட்டினில் உறங்குவாயோ? வெண்ணிலாவே!
6
பந்தடிப்போம் உன்னையென்று, வெண்ணிலாவே! - நீயும்
யாரில்வர, அஞ்சினையோ? வெண்ணிலாவே!
7
பளிங்குபோலும் உன்னுருவில், வெண்ணிலாவே! - கறை
பற்றியே இருப்பதேனோ? வெண்ணிலாவே!
8
பூமியின் உருநிழலோ? வெண்ணிலாவே! - அது
போகாக் குறுமுயலோ? வெண்ணிலாவே!
9
குன்றும் குகைகளுமோ? வெண்ணிலாவே! - அன்றிக்
கூனக் கிழவிதானோ? வெண்ணிலாவே!
10
ஆழியும் நீ வரக்கண்டு, வெண்ணிலாவே! - குதித்து
ஆடுவதெக் காரணமோ? வெண்ணிலாவே!
11
ஆதாரம் ஒன்றில்லாமல், வெண்ணிலாவே! நீயும்
அந்தரத்தில் நிற்பதேனோ? வெண்ணிலாவே!
12
சுற்றித் திரிவதும் ஏன்? வெண்ணிலாவே! - உனக்குச்
சொந்த இடம் ஒன்றிலையோ? வெண்ணிலாவே!
13
அண்டிவாராய் நீ யெனினும்,வெண்ணிலாவே! - இன்னும்
அகன்றெங்கும் போய்விடாதே, வெண்ணிலாவே!
14
பறக்கச் சிறகிருந்தால், வெண்ணிலாவே! - உன்றன்
பக்கம்வந்து சேருவேனே, வெண்ணிலாவே!
15
பால்போல் நிலவெறிக்கும் வெண்ணிலாவே! - என்றன்
பாங்கில்விளை யாடவாராய்! வெண்ணிலாவே!
16
பாங்கில்விளை யாடவந்தால், வெண்ணிலாவே-நல்ல
யால்தருவேன், பழந்தருவேன், வெண்ணிலாவே!
17
துன்பமிகத் தாமடைந்தும், வெண்ணிலாவே! - பிறர்க்குச்
சுகமளிப்பார் உன்போலுண்டோ? வெண்ணிலாவே!
18
இருளதனை விழுங்கவல்ல வெண்ணிலாவே! -உன்னை
இருள்விழுங்கும் சூழ்ச்சியெதோ? வெண்ணிலாவே!
19