சங்க இலக்கியத் தாவரங்கள்/095-150
வள்ளை
ஐபோமியா ரெப்டன்ஸ் (Ipomoea reptans,Poir.)
வள்ளை இலக்கியம்
‘வள்ளை’ என்பது தண்ணிரில் மிக நீண்டு வளரும் கொடி. இக்கொடியின் தண்டில் சிறு துளை இருக்கும். இதனைப் பரணர்,
“அம்தூம்பு வள்ளை அழற்கொடி மயக்கி”
-அகநா. 376 : 14
என்று பாடுகின்றார். இதன் இலைகளைச் சமைத்துண்ண மகளிர் கொய்வர்.
“வளைக்கை மகளிர் வள்ளை கொய்யும்”-பதிற். 29 : 2
இக்கொடி நீர் வயலிலும் வளரும் என்பதைப் புறநானூறு கூறும். (புற. 399 : 6).
இக்கொடியில் ஊதா நிறமான மலர்கள் பூக்கும். வள்ளையின் கொடி வளைந்து (புறநா. 16 : 13) நெளிந்து, நீண்டு வளருமாதலின், (மது. கா. 255) இதனையே மகளிர் காதுக்கு உவமையாகக் கூறுகின்றது. பிற்கால இலக்கியம்.[1]
நிகண்டுகள் இதற்குத் ‘தாளிகம்’ என்ற ஒரு பெயரைச் சூட்டுகின்றன.
வள்ளை தாவர அறிவியல்
|
| தாவர இயல் வகை | : | பூக்கும் இரு வித்திலைத் தாவரம் |
| தாவரத் தொகுதி | : | பைகார்ப்பெல்லேட்டே (Bicarpellatae) |
| தாவரக் குடும்பம் | : | கன்வால்வுலேசி (convolvulaceae) |
| தாவரப் பேரினப் பெயர் | : | ஐபோமியா (Ipomoea) |
| தாவரச் சிற்றினப் பெயர் | : | ரெப்டன்ஸ் (reptans) இது முன்னர் அக்குவாட்டிககா (aquatica) எனப்பட்டது. |
| சங்க இலக்கியப் பெயர் | : | வள்ளை |
| தாவர இயல்பு | : | நீர்க் கொடி. சுற்றிச் சுழன்று, வளைந்து, நெளிந்து, நீண்டு, நீரில் மிதந்து வளரும். ஒராண்டு வாழும் இயல்பிற்று. கொடித்தண்டில் சிறு துளையிருக்கும். |
| இலை | : | தனியிலை. நீண்ட இலைக் காம்பு மூன்று பிளவானது. அடியில் உள்ள இரு பிளவுகள் 3 அங்குல அகலமானவை. நுனியில் உள்ள நீண்ட பிளவு 5 அங். நீளம் வரையிருக்கும். |
| மஞ்சரி | : | நுனி வளராப் பூந்துணர். |
| மலர் | : | ஊதா நிறமானது. புனல் வடிவானது. உட்புறக் கழுத்து சற்றுக் கருநீலமாக இருக்கும். அழகிய மலர். |
| புல்லி வட்டம் | : | 5 புறவிதழ்கள். 2-3 அங்குலமுள்ள முட்டை வடிவானவை. |
| அல்லி வட்டம் | : | புனல் வடிவானது. 5 அகவிதழ்கள் அடியில் இணைந்து, குழல் போன்றும், மேலே ஊதா நிற மடல் விரிந்தும் அழகாகத் தோன்றும். |
| மகரந்த வட்டம் | : | 5 மெல்லிய தாதிழைகள் அகவிதழ்களின் உள்ளே காணப்படும் தாதிழை |
| கள் ஐந்தும் ஒரே மாதிரியில்லை. தாதுப் பைகள் நீளமானவை. தாதுவின் புறத்தே நுண்ணிய முட்கள் செறிந்திருக்கும். | ||
| சூலக வட்டம் | : | இரு செல் உடையது. நான்கு சூல்கள் சூல் தண்டு மெல்லியது. சூல்முடி உருண்டை வடிவானது. இரு பிளவானது |
| கனி | : | பளபளப்பான, நுண்மயிர் போர்த்திய 4-6 விதைகள் உண்டாகும். 2 வித்திலைகள் இரு பிளவானவை வளைந்து அமுங்கியிருக்கும். 4-6 வால்வுகளை உடைய காப்சூல் (உலர் கனி) |
இதன் இலைகளை உணவாகக் கொள்வதுண்டு. தண்டில் சிறு துளை இருத்தலின் இக்கொடி நீரில் மிதந்து வளரும். இத்துளை உள்ள உண்மையைப் புலவர்கள் கூறுவர்.
- ↑ “வள்ளைத்தாள் போல் வடிகாது இலைகாண்”
-மணிமே. 25 : 5