தமிழிசை (நாமக்கல் வி. ராமலிங்கம்)
(நாமக்கல் வி. ராமலிங்கம் பிள்ளை எழுதிய தமிழிசை என்னும் கவிதை. இது இசைத்தமிழ் என்ற நூலில் காணப்படுகிறது)
தன் நாட்டுத் தாய்மொழியில் எவரும் கேட்கத்
- தமிழ்நாட்டில் தமிழ்ப்பாட்டு வேண்டு மென்ற
நன்னாட்டத் துடன்ராஜா நம் சர். அண்ணா
- மலையவர்கள் அதற்காகப் பரிசு நாட்டத்
தென்னாட்டுச் சிதம்பரத்தில் அறிஞர் கூடித்
- தமிழ்மொழிக்குத் தேவையென்று தீர்மா னித்தால்
எந்நாட்டு யாராரோ எங்கோ கூடி
- ஏசுவதும் பேசுவதும் என்ன விந்தை!
- 1
- ஏசுவதும் பேசுவதும் என்ன விந்தை!
வந்தெந்தப் பிறமொழிக்கும் வரவு கூறி
- வகைசெய்து வாழ்வளித்து வரிசை யெல்லாம்
தந்தவர்கள் தமிழரைப்போல் வேறு யாரும்
- தாரணியில் இணைசொல்லத் தருவா ருண்டோ?
அந்தபெருங் குணத்தில்இன்னும் குறைவோ மில்லை;
- ஆனாலும் தமிழ்இனங்கள் வாழ வேண்டின்
சொந்தமொழிக் கலைகளெல்லாம் சுருங்கித் தேயப்
- பார்த்திருந்தும் சோம்புவது அறிவோ சொல்வீர்.
- 2
- பார்த்திருந்தும் சோம்புவது அறிவோ சொல்வீர்.
முக்கிமுக்கிப் பயின்றுபல முயற்சி செய்து
- முக்காலும் வாக்குரைத்து, மூச்சு வாங்கத்
திக்குமுக்க லாடுகின்ற பாஷைக் கெல்லாம்
- சிறப்பாகும் சங்கீதத் திறமை யென்றும்
சிக்குமுக்கு உச்சரிப்புச் சிறிதும் வேண்டாச்
- சீரிலகும் எழுத்தியல்பு சேர்ந்த தாகித்
தக்கமிக்கோர் இனிமையெனும் தமிழில் நாதச்
- சங்கீதம் குறைவென்றால் தரிக்க லாமா?
- 3
- சங்கீதம் குறைவென்றால் தரிக்க லாமா?
நாதமெனும் பிரமத்தைப் பணிவோம்; ஆனால்
- நாமறியா மொழியில்நமக் கேதுநாதம்?
கீதமென்று புரியாத பாட்டைக் கேட்டுக்
- கிளர்ச்சிபெறா உணர்ச்சியிலே கீதம் ஏது?
வாதமென்ன?இதிலெவர்க்கும் வருத்தம் ஏனோ!
- வாய்மணக்கப் பிறமொழியை வழங்கி னாலும்
ஓதியதும் உணர்ந்ததுவும் தாய்ப்பா லோடு
- ஊட்டியதாம் தாய்மொழிபோல் உதவா தொன்றும்.
- 4
- ஊட்டியதாம் தாய்மொழிபோல் உதவா தொன்றும்.
கலையென்றால் உணர்ச்சிகளைக் கவர வேண்டும்,
- களிப்பூட்டி அறிவினைப்போய்க் கவ்வ வேண்டும்,
நிலைகொள்ளாச் சிந்தனையை நிற்கச் செய்து
- நீதிநெறி தெய்வநினைப் பூட்டற் கன்றோ?
விலையில்லாப் பெருமை பலஉடைய தேனும்
- விளங்காத பாஷையிலே பாட்டைக் கேட்டுத்
தலையெல்லாம் சுளுக்கேற அசைத்திட்டாலும்
- தனக்கதுவோர் கலையின்பம் தருவ துண்டோ?
- 5
- தனக்கதுவோர் கலையின்பம் தருவ துண்டோ?
சங்கீதம் பாடுதற்கும் மொழிக்கும் என்ன
- சம்பந்தம் என்றெவரும் சாதிப் பாரேல்,
இங்கேதும் தடையில்லை ஏற்றுக் கொள்வோம்,
- எல்லாமே தமிழ்ப்பாட்டாயிருந்தா லென்ன?
சிங்கார வாதங்கள் பலவும் பேசிச்
- சிறப்பான முயற்சியிதைச் சிதைக்க லாமா!
தங்காமல் தயங்காமல் தளர்ந்தி டாமல்
- தமிழ்நாட்டார் இச்செயலைத் தாங்க வேண்டும்.
- 6
- தமிழ்நாட்டார் இச்செயலைத் தாங்க வேண்டும்.
கேட்டவர்கள் பாடினவர் எல்லாம் சேர்ந்து
- கெடுத்துவிட்ட காரியத்தைக் கிண்டிக் கிண்டி
நாட்டிலின்னும் இதற்குமொரு சண்டை யின்றி
- நல்லஒரு தமிழ்ப்பண்ணை நடத்த வேண்டும்:
பாட்டினோ டிலக்கியமும் படியப் பாடிப்
- பருந்தோடு நிழல்செல்லும் பான்மை காப்போம்
கூட்டமிட்டுப் பேசிவிட்டு மறந்தி டாமல்
- குற்றமிதைத் தமிழ்நாட்டிற் குறைக்க வேண்டும்.
- 7
- குற்றமிதைத் தமிழ்நாட்டிற் குறைக்க வேண்டும்.
பலநாட்டுச் சங்கீதம் நமக்கு வேண்டும்
- பலபலவாம் முறைகளையும் புகழ வேண்டும்
விலைகூட்டிக் கலையறிவை வாங்கி யேனும்
- விதம்விதமாய்த் தமிழ்மொழியில் விரிக்க வேண்டும்
அலைநீட்டும் கடல்கடந்த அறிவா னாலும்
- அத்தனையும் தமிழ்வழியில் ஆக்க வேண்டும்
நிலைநாட்டித் தமிழ்க்கலைகள் வளர்ச்சிக் கென்றே
- நிச்சயமாய் உழைக்க ஒரு நிலையம் வேண்டும்
- 8
- நிச்சயமாய் உழைக்க ஒரு நிலையம் வேண்டும்
ஆதலால் தமிழ்நாட்டில் தமிழ்ப் பாட்டிற்கே
- ஆதரவு அகத்தியமாய் அதிகம் வேண்டும்;
காதலால் தாய்மொழியைக் காப்ப தன்றிக்
- கடுகளவும் பிறமொழிமேற் கடுப்ப தல்ல;
தீதிலா திம்முயற்சி சிறப்புற் றோங்கத்
- திருவருளைத் தினந்தினமும் தொழுது வாழ்த்தி
வாதெலாம் விலக்கிக்கலை வாண ரெல்லாம்
- வல்லநல்ல தமிழ்பாடி வாழ வேண்டும்.
- 9
- வல்லநல்ல தமிழ்பாடி வாழ வேண்டும்.