முக்கனி படைத்த நாடு, முத்தமிழ் படைத்த நாடு, முத்தமிழால் முன்னேற — மறுமலர்ச்சி பெற முத்தமிழைப் போற்றுங்கள்! முத்தமிழை முன்னேற்றப் பாதைக்குப் பயன்படுத்துங்கள்!...
🞸🞸🞸
தமிழ்மொழி மூலம், முத்தமிழ் மூலம், தமிழரது வாழ்வில் மாறுதலையுண்டாக்கிட முடியும்--நிச்சயமாக.
🞸🞸🞸
தமிழர், தம்மின மொழியை, தமிழ் மொழியைப் பெரிதென மதித்துப் போற்றி, புகழ்ந்து, பரப்பிடும் நிலைமை, மறுமலர்ச்சி, தமிழின் மறுமலர்ச்சி பூத்துக் குலுங்கி வரும் இந்த நேரத்திலேதான் இந்தச் சூழ்நிலையில் தான், தமிழரை, தன்மானமுள்ளோராக நாகரிக மாந்தராக, நல்ல வாழ்வு நடத்திடும் மனிதராக மாற்றமுடியும்.
🞸🞸🞸
தமிழன் தமிழைப் படிக்கத் தொடங்கி விட்டான்; தமிழைப் போற்றத் தலைப்பட்டுவிட்டான்-தமிழருக்குத் தனிப் பெருமை, தனது மொழிக்கு. தன் தாய்- மொழிக்குத் தனது பணியைச் செய்திட முன் வந்து விட்டான். நாடெங்கும் தமிழ்த் திருநாட்கள், முத்தமிழ் முழக்கங்கள் நடைபெறும் நன்னாளைக் காண்கிறோம் இன்று!
🞸🞸🞸
மறைந்த தமிழ்ப் பெரியார் மறைமலைகளாரும், தள்ளாத வயதடைந்தும் அடி தளராது, தமிழ்த் தொண்டு செய்து வரும் தமிழ்ப் பெரியார் திரு. வி. கலியாணசுந்தரனார் அவர்களும், தமிழ்ப் பற்றை-
