31
7. கனி
1. கனி என்றால் என்ன?
கருவுற்றுப் பழுத்த சூல்பையே கனி.
2. காய் என்றால் என்ன?
கருவுற்று முதிர்ந்த சூல்பையே காய்.
3. கருவுறாக்கனி என்றால் என்ன?
கருவுறாமல் முதிர்ச்சி அடையுமானால் அக்கனி கருவுறாக்கனி, எ-டு. வாழை, கொய்யா.
4. கனியின் வகைகள் யாவை?
1. தனிக்கனி - மா
2. திரள்கனி - சீதாப்பழம்.
3. கூட்டுக்கனி - பலாப்பழம்.
5. தனிக்கனி என்றால் என்ன?
ஒரு சூல்பையிலிருந்து உண்டாகும் கனி, மா.
6. தனிக்கனியின் வகைகள் யாவை?
1. சதைக்கனி - ஆப்பிள்.
2. உலர்கனி - தென்னை நெற்று.
7. சதைக்கனியின் வகைகள் யாவை?
1. சாற்றுக் கனி - திராட்சை
2. ஒட்டுக்கனி - மா.
3. பூத்திரள் கனி - ஆப்பிள்.
4. கொப்பூழ்க்கனி - பறங்கி.
5. நாரத்தை வகைக்கனி - எலுமிச்சை.
8. உலர்கனி வகைகள் யாவை?
1. வெடிகனி, 2. வெடியாக் கனி.
9. வெடிகனியின் வகைகள் யாவை?
1. பருப்புக்கனி - உளுந்து.
2. ஒருபுற வெடிகனி - எருக்கு.
3. குறுக்குமுறிகனி - கருவேல்.
4. அறைவெடி பொதிகை - வெண்டை
5. தடுப்பு வெடி பொதிகை - ஆடுதீண்டாப்பாளை.
6. கவர்பிரிபொதிகை - ஊமத்தை.