நறுந்தொகை
உரை
ஓம் எனும் பிரணவ மந்திரத்தின் பொருளாகிய விநாயகரின் திருவடிகளை வணங்குவோம்.
அதிவீரராம பாண்டியன் கொற்கை என்னும் நகரை ஆள்பவன்; வெற்றிதரும் வேல்பொருந்திய கையை உடையவன்; பிறந்த குலத்திற்கு மணிமுடி போன்றவன். அவன் நல்ல தமிழில் விளக்கமாகக் கூறியுள்ள நறுந்தொகையைப் படித்துத் தம்மிடத்துக் குற்றம் உண்டாகாதவாறு நீக்குபவர், ஒரு குறையும் இல்லாதவர் ஆவர்.
1. கல்வி கற்பித்த ஆசிரியன் கண்ணாற் காணப்பெறும் கடவுள் ஆவான். -
2. குற்றம் இல்லாதபடி பேசுவதே கல்விக்கு மதிப்பாகும்.
3. தம் சுற்றத்தாரைக் காப்பது செல்வர்க்குப் பெருமை. -
4. வேதங்களை முறையாக ஒதுவதும் அவற்றிற் சொன்னவாறு நடத்தலும் வேதியர்க்குச் சிறப்பாகும். - -
5. நீதிமுறைப்படி ஆட்சி செய்வதே அரசர்க்கு அழகாகும். -
6. மேன்மேலும் வளரும் செல்வத்தைப் பெருக்குவதே வணிகர்க்கு உயர்வு.
7. பயிர் செய்து உண்பதை விரும்புதல் வேளாளர்க்குப் பெருமை. - -
8. பின்வருவதை முன்னதாக அறிந்து அரசர்க்குச் சொல்லுதலே மந்திரிக்குச் சிறப்பு. - -
9. அஞ்சாமையும் வீரமும் படைத்தலைவனுக்கு மேன்மை.
10. வந்த விருந்தினருடன் கலந்து இருந்து உண்ணுதலே குடும்பத்துக்கு நல்லது. - -
11. எதிர்வாதம் செய்யாமல் அமைதியாகக் குடும்பத்தை நடத்துவதே வீட்டுப் பெண்களுக்கு முறை.
