29
இளையவர் முதியவர் ஏழையர் செல்வர்
வளையல் வனிதையர், வழங்கக் குறையாத
கல்வியைக் கற்றவர், கல்லாத மற்றவர்,
வல்லவர், நோயால் வாடும் உடம்பினர்,
தீண்டத் தகாதவர் யாவரும் ஒன்றாய்
அரிதின் முயன்று குருதிசிந் தாமல்
பெற்றஇச் சுதந்தரம் பெரும்பே ரிலக்கியம் !
இப்பெரும் போரை ஏற்று நடத்திய
ஒப்பருந் தலைவன் ஒருடைப் பக்கிரி !
வேல்கைக் கொண்டவன் அல்லன் ; மெலிந்த
கோல்கைக் கொண்டவன் ; குமுறிக் கிளம்பும்
குண்டுப் போருக் குரியவன் அல்லன் ;
தொண்டுப் போருக் குரியவன் ; கொல்லும்
கத்தியைக் கையில் ஏந்த மறுத்துச்
சத்தியம் ஏந்திச் சாதிக்க வந்தவன் !
உண்ணா விரதமும் தன்னல மறுப்பும்
அண்ணலின் பெரும்படை அணி வகுப்புகள் !
அணிவகுப் போய்ந்தது ; அவன் தந்த வெற்றிக்
கனிக்குலை இந்தியர் கரங்களில் உள்ளது.
பலாப்பழம் போன்ற பருத்ததோள் மறவர்
விழாத்தரு கின்றனர் ; வெற்றிக் களிப்பில்
கன்னியர் தங்கள் கன்ன மேடையில்
புன்னகை யென்னும் புதுவிளக் கெடுத்தனர் ;
வண்ணக் கொடிகள் வாங்கிய சுதந்தர
விண்ணில் சிறகை விரித்துப் பறந்தன.
