இப்பக்கம் மெய்ப்பு பார்க்கப்பட்டுள்ளது
சிறுவர் இலக்கியம் 53
43.வறுமைக் குழந்தை
(கண்டோர் கூற்று)
சுவை: இளிவரலும் அழுகையும்
1. வறியோர் வீடாம் குடிசையிலே
வந்து பிறந்த குழந்தையைப்பார்;
சிறுமை தனையே இளமையினிற்
சேர்ந்து நிற்பது பரிதாபம்.
2. எண்ணெய் அறியாத் தலைமயிரில்
ஈரும் பேனும் குடியிருக்கும்;
உண்ணப் பாலும் கிடையாது;
உணவும் வயிற்றை நிரப்பாது.
3. நெய்யும் தயிரும் கண்டதில்லை;
நீரா காரமும் கூழுமுண்டு;
கையில் தீனி கிடையாது;
கட்டத் துணியும் அதற்கில்லை.
4. சின்ன குடிசை அதன்வீடு;
சிறுசிறு கந்தல் அதன்படுக்கை
பொன்னைப் போல நிறமிருந்தும்,
புழுதி அதனை மறைத்திருக்கும்
5. சிணுங்கும் முகமே அதற்குண்டு;
சிரித்த முகத்தைக் கண்டதில்லை;
இணங்கிக் கூடி விளையாட
எந்தக் குழந்தையும் வருவதில்லை.
