4
பெரியாரும் சமதர்மமும்
கதர் அணிதல் பெருகியது. உற்பத்தியும் வளர்ந்தது. தமிழ்நாட்டில், கதரைப் பரப்பியதில், வளர்த்ததில் அவருடைய பங்கு மிகப் பெரியது.
தீண்டாமை, இந்தியாவின் தனி நோய்; பொல்லாத நோய்; ஈராயிரம் ஆண்டுகளாகத் தொடரும் நோய். கோடிக்கணக்கானவர்களை விலங்குகளைப் போல், நடத்தும் கொடுமை, அவர்களுக்கு அடிப்படை உரிமைகளை மறுத்து விட்ட தவறான முறை, வாய்ப்புகளே கொடாத சுரண்டல் முறையின் கோர உருவம்.
இருக்க இருக்கைகளை மறுத்து விட்டதோடு, குளிக்க—குடிக்க நீரும் கொடாத, வன்முறை தீண்டாமையாகும். அதன் அடி மரம், சாதி வேற்றுமை என்னும் முள் மரமாகும்.
இந்திய நாடு தழுவிய இக்கொடுமையைப் புத்தருக்குப் பின், ஒழிக்க முயன்ற பெருந் தலைவர் இல்லை. ஒழிக்க முயன்ற பேரியக்கம் இல்லை.
சுரண்ட வந்த ஆங்கிலேயரையும் மிரட்டி, இந்நாட்டின் மரபுகளில், பழக்க வழக்கங்களில் அவர்கள் தலையிடுவதில்லை என்னும் வாக்குறுதியை இந்திய நாட்டின் மேட்டுக் குடியினர் பெற்று விட்டார்கள்.
எனவே, சாதி ஏற்றத் தாழ்வுக் கொடுமைகளும், தீண்டாமை, நெருங்காமை, உடனிருந்து உண்ணாமை, கலவாமை ஆகிய தீய மரபுகளும், கொடி கட்டிப் பறந்தன. இத்தீமை செத்தாலும் விடுவதில்லை. சுடுகாட்டிலும், இடுகாட்டிலும், சாதிப் பிரிவுகளின் அடிப்படையில், தனித்தனி சுடுகாடுகள், இடுகாடுகள் இருந்தன; இருக்கின்றன.
மதம் மாறினாலும், இந்நோய் விடுவதில்லை. கிறித்தவர்களானாலும் ‘சாதி இழிவு’ ஒட்டிக் கொண்டிருக்கும்.
தொழுகைக் கூடங்களில், ஆதி திராவிடக் கிறித்தவர்களுக்குத் தனியிடமும், மற்றவர்களுக்கு வேறு இடமும் இருந்தன. இன்றும், அத்தகைய கிறித்துவக் கோயில்கள் உள்ளன.
இந்த நோயை அடியோடு ஒழிக்கப் பாடுபட்டவர் ஈ. வெ. ராமசாமி ஆவார். மாணவப் பருவத்திலேயே, சாதி வேர்களை உடைத்தெறிந்த பெரியார், தமிழ்நாடு காங்கிரசுத் தலைவராகவும், அத்தொண்டாற்ற வாய்ப்புப் பெற்றார்.
