7. சமதர்மத்தை நோக்கியே
சுயமரியாதை இயக்கம்
மாம்பிஞ்சு முற்றிய காயாகிறது; முற்றிய காய் செங்காயாகிறது; செங்காய் கனியாக மாறுகிறது.
அரசியல் விடுதலை இயக்கத்தின் வாயிலாக, ஈ.வெ.ராமசாமி பொதுத் தொண்டிற்கு வந்தார். முழு நேரத் தொண்டாகத் தியாகஞ் செறிந்த தொண்டாக, அது வளர்ந்தது. அதற்காக, வாணிகத்தை மூடி விட்டார். ஆண்டுக்கு இருபதாயிரம் ரூபாய் வருமானத்தைக் கொடுத்த தொழிலை விட்டு விட்டார்.
பம்பரம் போல், மூலை முடுக்கெல்லாம் சுற்றிச் சுற்றி, விடுதலை உணர்வைச் சுரக்க வைத்தார். காந்தியடிகளின் கட்டளையைக் கடைப் பிடித்தார். வழக்கு மன்றங்களுக்குப் போகக் கூடாது என்ற காந்தியத் திட்டத்தைப் பின் பற்றியதால், அய்ம்பதாயிரம் ரூபாய்களை இழந்தார்.
அமைப்பினை வளர்ப்பதிலும், போராட்டங்களை நடத்துவதிலும், வெற்றி வாகை சூடி வந்த ஈ.வெ. ராமசாமி தியாகங்களை அடுக்கிக் கொண்டிருந்த தலைவர், புகழ் ஒளியில் மயங்கி விடவில்லை. அடுத்துச் செய்ய வேண்டியனவற்றைப் பற்றிச் சிந்தித்தவாறே இருந்தார்.
இந்திய தேசிய காங்கிரசின் பார்வை, அரசியல் விடுதலைக்கு அப்பால் விரியவில்லை. சமுதாய மாற்றம் பற்றி, அதற்குப் போதிய அளவு முற்போக்குக் கண்ணோட்டம் இல்லை என்பது ஈ.வெ.ராமசாமிக்குப் புலனாயிற்று.
சாதிகளாகப் பிரிந்து கிடக்கும் சமுதாயத்தில், ‘வகுப்பு வாரி உரிமை,’ அடிப்படை நீதி என்று தமிழ்நாட்டுக் காங்கிரசாரின் மனதில் பதிய வைக்க முயன்றார். அது செவிடன் காதில் ஊதிய சங்காயிற்று.
பசுங்காயாக முற்றி வந்த ஈ.வெ.ராமசாமி, செங்காயாக மாறினார் எனலாம். காங்கிரசு இயக்கத்தை விட்டு வெளியேறி-
