150
கலைஞர் மு. கருணாநிதி
பாண்டியனின் படைகள் எங்களை வளைத்துக் கொள்ளுமேயானால் நாங்கள் நிச்சயம் தப்ப முடியாது. எங்களை வெல்வார் யாருமில்லை என்று அறைகூவல் தருகிற நிலையில் நாங்கள் இல்லை.
ஆனால் ஒன்று. எந்த ஓர் உயிரை மீட்பதற்காகப் பாண்டியனின் படையெடுப்பு நடக்க இருக்கிறதோ, அந்த உயிரை அவர்களால் கண்டிப்பாக மீட்க முடியாது. அந்த உயிர் உன் உயிர்தான்! நாங்கள் அத்தனை பேரும் பாண்டியர்களால் சூழப்படுகிற நேரத்தில் உன்னை உயிரோடு அவர்களிடம் திருப்பித் தருவோமா? யார்தான் தருவார்கள்? உனக்குத் தெரியாதா என்ன? அதனால் நீ உயிர் தப்புவதற்கு ஒரே ஒரு வழி இருக்கிறது - அதைச் சொல்லுகிறேன்; உன்னால் நிறைவேற்ற முடியுமா? முடியாதா? என்று உடனே கூறிவிடு!" என்று ஒரு சொற்பொழிவே நடத்திவிட்டான்.
என்னதான் செய்ய வேண்டுமென்று சொல்கிறான் என்பதைத் தெரிந்து கொள்ளும் ஆவலில், "என்ன வழி?" என்று கேட்டு வைத்தான் செழியன்.
"பிரமாதமாக ஒன்றுமில்லை. பெருவழுதிப் பாண்டியனுக்கு ஓர் ஓலை அனுப்ப வேண்டும். அவ்வளவுதான்." - இருங்கோவேள் சற்றுக் கனிவுடன் இந்த வார்த்தைகளை உதிர்த்தான்.
"என்ன ஓலை?"
"திருமண ஓலை!"
"திருமண ஓலையா!"
"ஆமாம் -அதுவும் உனக்குத் திருமணம் நடக்கப் போகிறது என்ற செய்தியைத் தாங்கிய ஓலை"
"புரியவில்லை எனக்கு!"
"புரியும்படி சொல்கிறேன். நீயே எழுத வேண்டும். பாண்டியனுக்கு ஓலையில் குறிப்பிடப்பட வேண்டிய முக்கிய வரிகள் எவை தெரியுமா?'
"எவை?"
"பாண்டிய மன்னர் அவர்களே! என்னை மீட்பதற்காகப் பெரும்படை திரட்டிவரப் போவதாகச் செய்தி கேள்விப்பட்டேன். என்னை மீட்க வேண்டிய அவசியம் உங்களுக்கு இல்லாமற் போய்விட்டது என்பதை இந்த ஓலை வாயிலாகத் தெரிவித்துக் கொள்கிறேன். நான் இப்போது இருங்கோவேளின் உற்ற துணைவனாக மாறி விட்டேன். பாண்டியப் பேரரசு இந்த உறவின் மூலம் எனக்குப் பகையாகிறது."
"ஆ! என்ன சொன்னாய்?"
"பதறாதே செழியா? முழுவதையும் கேள்! இனிமேல்தான் இன்பமான செய்தியே வரப்போகிறது."
