மகாகவி பாரதியார்/அலங்காரக் குறும்பு!
பாரதியார்
அலங்காரக் குறும்பு !
ஊராரே கேளுங்கள் இந்த ஒருசேதி !
பாரதியார் என்மகனைப் பார்த்துப் பரிகசித்தார்.
⚬⚬⚬
ஏன் பாரதியாரே, என்மகன்உம் காரியத்தில்
தான்வந்து வீணில் தலையிட்டுக் கொண்டதுண்டா?
இல்லைஎன்று சொல்கின்றீர், அவ்வா றிருக்கையிலே
தொல்லை தரும் வார்த்தை என்மகனைச் சொன்னதேன்?
⚬⚬⚬
ஏழ்மை கிழத்தன்மை நோய்கள் இவற்றையெல்லாம்
ஆழக் குழிதோண்டி அப்படி யே புதைத்துத்,
தேசத்தை மேல்நிலையிற் சேர்ப்ப தெனும் உங்கள்
ஆசையோ பேராசை ! அப்படித்தான் ஆகட்டும் !
அச்செயலை நான் ஒன்றும் ஆக்ஷேபம் பண்ணவில்லை;
கச்சைகட்டி ஆடுங்கள் ! கைதட்டிக் கூவுங்கள் !
எங்கள் செயலுண்டு யாமுண்டு, மற்றவிதம்
உங்களிடம் யாரையா ஓடிவந்தார்? சொல்லும் !
⚬⚬⚬
'இளமையிற்கல் இளமையிற்கள்' என்றந்த
இளம்பையன் வீதியிலே சொன்னான் எனில், நீர்
'முதுமையில் மண் முதுமையில் மண்' என்றே
எதிர்வந்து சொன்னீரே ! எல்லாரும் கேட்டுக்
குலுங்க நகைத்தாரே ! ஐயா, குறும்பில்
அலங்காரம் சேர்த்தீரோ அங்கு?
குறிப்பு: (பையனின் தந்தை, பாரதியாரிடம் பேசியதாகக்