ஈசாப் கதைப் பாடல்கள்/ஓநாயின் கேள்வி
ஆட்டை வெட்டி இடையர்கள்
- ஆசை யோடு கூடியே
வீட்டில் உண்ண லாயினர்;
- ‘விருந்து’ என்று கூறினர்.
‘கோனார் ஐயா!’ என்றதும்,
- குரலைக் கேட்டுத் திரும்பினர்.
ஓநாய் ஒன்று அவ்விடம்
- உரைத்த வார்த்தை கேட்டனர்.
‘வளர்த்த ஆட்டை நீங்களே
- வதைத்துக் கொன்று தின்கிறீர்.
உளத்தில் மகிழ்ச்சி பொங்கவே
- உண்டு ஏப்பம் விடுகிறீர்.
ஆட்டில் ஒன்றை நானுமே
அடித்துக் கொல்ல வந்திடின்,
வேட்டை நாயை ஏவுவீர்;
வேங்கை போலச் சீறுவீர்.
என்னை விரட்டி விட்டபின்
ஏதும் போட்டி யின்றியே,
கொன்று ஆட்டைத் தின்கிறீர்,
கொடிய மனிதர் நீங்களே!’
