குழந்தைச் செல்வம்/கிளி
26. கிளி
தேமலர்ச் சோலையிலே - வாசமெழு
தென்றல் உலாவையிலே,
மாமண மங்கையைப்போல் - பெரிது
மகிழ்ந்துநீ தங்கினையோ?
1
பச்சிலையும் கனியும் - நிறைந்து
படர்ந்து வளர் ஆலின்
உச்சியிற் சென்றிருந்தால் - எப்படியான்
உன்னையும் கண்டிடுவேன்?
2
நாடும் என் உள்ளத்திலே - குடிபுகும்
நாயகி கையமர்ந்து,
பாடி அமுதளிக்கும் - அழகிய
பைங்கிளி நீயலவோ?
3
பூனைகள் இங்குவரா - வேடர்தம்
பொறியின் பயமும் இல்லை;
யானுனைக் காத்திடுவேன் - இறங்கி நீ
என்கையில் வந்திடாயோ?
4
வட்டமா யுன்கழுத்தில் - ஒருநாளும்
வாடாத ஆரமதை
இட்டவர் ஆரடியோ? - எனக்கும்
இயம்புவையோ? கிளியே!
5
மாணிக்க மூக்கழகும் - மரகத
வர்ண வடிவழகும்
காணக்கண் ணாயிரந்தான் - இருப்பினும்,
கண்டு முடிந்திடுமோ?
6
கத்திரி போலவெட்டிக் - கனியினைக்
கௌவி யெடுத்தோடச்
சித்திர வாயளித்த - கடவுள்
திருவருள் சற்றோ? அம்மா!
7
சாய்ந்து தலைவணங்கி - இனிய
தமிழைநீ கற்குமுறை,
ஆய்ந்த புலவருமே -எழுதி
அயர்ந்துகை சோர்வார், அம்மா!
8
பறக்கச் சிறகிருந்தும் - மரக்கிளை
பற்றிநீ ஏறுவதேன்?
திறத்தை உலகினுக்கு - மிகவும்
தெரிவிக்கவோ? கிளியே!
9
காட்டுத் தினைக்கதிரை - பறித்து நீ
கண்டித் தருந்தாமல்,
கூட்டுக் கெடுத்தோடும் - குறிப்பெது
கூறுவையோ? கிளியே!
10
ஒற்றை யொருகாலில் - நின்றுகனி
உண்ணும் அறியவித்தை
கற்றதும் யாவரிடம் - அவரை நீ
காட்டுவையோ? கிளியே!
11
கானத் தினைப்புனத்தில் - குறமகள்
காவலிற் கொள்ளையிடல்
ஈனச் செயல் அல்லவோ? - குலத்துக்கு
இழுக்கமும் வந்திடாதோ?
12
செம்பவழ வாயைத் - திறந்து நீ
செப்பு மொழிகேட்கில்,
உம்பர் அமுதமெல்லாம் - செவியகத்து
ஓடி யொழுகும், அடி!
13
கொம்பிற் கொலுவிருந்து - களித்து நீ
கூவுங் குரல்வருமேல்,
பம்பி யெழுஞ்சோலை - எனக்குப்
பரம பதம், அடியோ!
13
உண்ணும் கனியிலெழும் - சுவையினை
உள்ளம் களிகொளவே,
பண்ணிற் கலந்திடநீ - தெரிந்துசெய்
பக்குவம் ஏதடியோ?
14
பேசும் மரகதமே! உனைத் தினம்
பேணி வளர்த்திடுவேன்;
ஆசை யமுதமொழி - அளிக்க நீ
அண்டையில் வந்திடாயோ?
16
பண்ணுக் கிசைந்ததம்மா! - பழத்தொடு
பாலுங் கலந்ததம்மா!
மண்ணுக் கமுதமம்மா! - உனது செவ்
வாய்மொழி, தத்தையம்மா
17
மாணிக்கச் செப்பினிலே - அமுதை
வடித்துச் சுவைபெருக்கி,
பேணி யுனக்களித்த - பிரமன்
பெரியன் பெரியன், அம்மா!
18
சின்னஞ் சிறுபள்ளியில் - உனக்கொரு
சிங்காரப் பெஞ்சுமிட்டுத்
தின்னக் கனியளித்துப் - பாலபாடம்
செப்புவன் வா, கிளியே!
19
கண்ணுக் கினிமையாகி - என திரு
காதும் குளிரச்செய்யும்
வண்ணப் பசுங்கிளியே!-குயிலும் உன்
மாதவஞ் செய்ததுண்டோ?
20
பாலுக்குச் சீனியைப்போல் - பசுந்தமிழ்ப்
பாடலுக் கின்னிசைபோல்,
சோலைக்குப் பைங்கிளியே! - உனது
துணையும் இனிதே அம்மா !
21
உள்ளக் களிப்பெழுந்து - வெளியில் வந்து
உன்னுருக் கொண்டதுவோ?
மெள்ளப் பிடித்துநெஞ்சில் - அணைத்திட
வேட்கை மிகுதே அம்மா!
22