குழந்தைச் செல்வம்/கூண்டுக் கிளி

by கவிமணி தேசிக விநாயகம் பிள்ளை

9. கூண்டுக் கிளி

சிறுவன்

பாலைக் கொண்டு தருகின்றேன்,
      பழமும் தின்னத் தருகின்றேன்;
சோலைக் கோடிப் போகவழி
      சுற்றிப் பார்ப்பதேன் கிளியே? 1

காட்டில் என்றும் இரைதேடிக்
     களைத்திடாயோ? உனக்கிந்தக்
கூட்டில் வாழும் வாழ்வினிலே
     குறைகள் ஏதும் உண்டோ? சொல். 2

கிளி

சிறையில் வாழும் வாழ்வுக்குச்
     சிறகும் படைத்து விடுவானோ?
இறைவன் அறியாப் பாலகனோ?
     எண்ணி வினைகள் செய்யானோ? 3

பாலும் எனக்குத் தேவையில்லை ;
     பழமும் எனக்குத் தேவையில்லை ;
சோலை எங்கும் கூவி நிதம்
     சுற்றித் திரிதல் போதுமப்பா! 4