குழந்தை இலக்கியம்/கல்வி
| 46. | மெய்ப்பொருள் கல்வி | ... | 97 |
| 47. | பள்ளிக்கூடம் | ... | 100 |
| 48. | பள்ளிக்கூடம் - II | ... | 102 |
| 49. | பள்ளிச் சிறுவர் | ... | 104 |
| 50. | படிக்க வேண்டும்! | ... | 105 |
| 51. | தாய்மொழியே தமிழ் | ... | 107 |
| 52. | கட்டாயக் கல்வி | ... | 110 |
| 53. | உடற் பயிற்சி | ... | 113 |
| 54. | எப்படி ஆள்வீர்? | ... | 114 |
தலைசிவிப் பள்ளிக்கே ஒடு!-நல்
தங்கப் பதுமையாம் தோழர்க ளோடு!
விலையில்லா மெய்ப்பொருள் கல்வி!-அதை
விரும்பிப் படித்தால் அறிவுண்டாம் செல்வி! 1
அழுக்கில்லா ஆடையே மேன்மை-அதை
அணிவதா லல்லவோ உடற்குண்டாம் தூய்மை!
ஒழுங்கோடு நூல்களைத் தூக்கி-நில்லாது
ஓடடி ஓட்டி பள்ளியை நோக்கி! 2
சின்னஞ் சிறுகுயில் போல-இசை
சிந்திச் சிரித்துச் செவ்விதழ் காட்டு!
பொன்னொத்த தோழர்க ளோடு-பள்ளி
போகும் வழியிலும் ஒற்றுமை காட்டு! 3
வழியிற் பெரியோரைக் கண்டால்-நல்
'வணக்கம்' எனச்சொல்லு! ஒரமாய்ச் செல்லு!
இழிந்தவர் கல்லாத மக்கள்!-என்ன
இருந்தாலும் கல்லாதார் வயல்வெளிப் புற்கள்! 4
வேளை கடந்து செல்லாதே!-பள்ளி
வெளியினில் அங்கிங்கு மாக நில்லாதே!
நாளைக் கடத்திடப் போமோ?-சென்ற
நாளும் திரும்பி வருதலும் ஆமோ? 5
தப்பாமல் கல்வியை ஓது!-கல்வி
தரும்புகழ்க் கீடிந்த உலகினில் ஏது?
மப்பில்லா வானம்போல் ஆகும்!-கல்வி
வளமில்லா வாழ்க்கையில் பயனற்றுப் போகும்! 6
கற்பிப்போர் கண்கொடுப் போரே!-அந்தக்
கணக்காயர் உரையினில் இருசெவி சேரே!
நற்பெயர் எடுத்திட வேண்டும்!-நாளும்
நன்றாகப் படித்துநீ முன்னேற வேண்டும்! 7
அன்போடு கணக்காயர் போற்று!-பள்ளி
அறிவுரை வாழ்க்கையின் இருளுக்கு மாற்று!
என்றென்றும் கற்றிட லாகும்!-அறிவு
இல்லாமை என்கின்ற சொல்லற்றுப் போகும்! 8
பள்ளியிற் சள்ளை பொல்லாதே!-உடன்
பயில்பவர் மீதுநீ கோளும் சொல்லாதே!
கள்ளத் தனத்தைக் கொள்ளதே!-செல்லாக்
காசாவாய்! கற்காமல் நாளைத் தள்ளாதே! 9
கற்றுத் தெளிவதே மேன்மை!-கல்வி
கல்லாத மக்களால் வருவதே தீமை!
பெற்றவர் காதுக்குத் தேனாம்-பிள்ளை
பேச்சாளி, அறிவாளி என்பது தானாம்! 10
அறிவைப் பெருக்கும் கூடம்;
அன்பைப் பெருக்கும் கூடம்;
மறைவு நீக்கி உம்மை
மனிதன் ஆக்கும் கூடம்! 1
ஒழுக்கம் சேர்க்கும் கூடம்;
உணர்வைச் சேர்க்கும் கூடம்;
வழுவை நீக்கி உம்மை
வாழ வைக்கும் கூடம்! 2
கண்ணை அளிக்கும் கூடம்;
கருத்தைக் கொடுக்கும் கூடம் ;
எண்ணம் தன்னில் தூய்மை
என்றும் சேர்க்கும் கூடம்! 3
கடமை காட்டும் கூடம்;
கைத்தொழில் பழக்கும் கூடம்;
மடமை போக்கி உம்மை
வாழ வைக்கும் கூடம்! 4
நாட்டுப் பற்றை ஊட்டும்;
நலிவை நெஞ்சில் ஒட்டும்;
ஏட்டுச் சுரை ஆகாமல்
ஏறாய் ஆக்கும் கூடம்! 5
பள்ளிக் கூடம் போவோம்!-நாம்
பள்ளிக் கூடம் போவோம்!
துள்ளி ஒடி ஆடி-நாளைத்
தொலைத்தால் என்ன உண்டாம் ? 1
உடலைத் தேய்த்துக் குளித்தே-வீட்டில்
உள்ள ஆடை உடுத்தே
பொடியோ டெண்ணெய் தோசை-அப்பம்
புசித்து நூலை எடுத்தே- 2
அடக்கத் தோடே செல்வோம்!-மணி
அடிக்கு முன்னே செல்வோம்!
இடக்கு வழியிற் செய்தால்-காண்போர்
ஏசிப் பழிப்பார்! வேண்டாம்! 3
தோழ ரோடு சேர்ந்தே-நூலைத்
துருவித் துருவி ஆய்ந்தே
ஆழ மாகக் கற்றே-நல்ல
அறிவை யடைய வேண்டும்! 4
கற்றுக் கொடுப்போர் மேலோர்!-அவர்
கருத்தை ஏற்று நடப்போம்!
கற்றுக் கொடுப்போர்க்(கு) அன்பை-என்றும்
காட்ட வேண்டும்! வேண்டும்!5
துள்ளிக் குதித்து வருகின்றார்
பள்ளிச் சிறுவர் சாலைக்கு;
கள்ளம் கபடம் அறியாதார்;
கவலை ஒன்றும் தெரியாதார்! 1
பேச்சைச் சிரிப்பைக் கேட்பீரே;
பின்புற மிருந்து பார்ப்பீரே;
கூச்சம் இன்றி அவர்எண்ணக்;
கோட்டை நுழைந்து பார்ப்பீரே! 2
பாட்டம் ஆட்டம் பார்த்திடுவீர்;
பரிகசச் சொல்லைக் கேட்டிடுவீர்;
கூட்ட மாக அவர்களுக்குள்
செய்யும் குறும்பைக் கண்டிடுவீர்! 3
அடக்கம் ஒடுக்கம் கற்றிடுவோம்;
அன்புப் பெருக்கைக் கொண்டிடுவோம்;
துடுக்கை விட்டுச் சிறுவரைப்போல்
தூய எண்ணம் பெற்றிடுவோம்! 4
படிக்க வேண்டும் ஆண்பெண்!
படித்தால் உண்டாம் முக்கண்!
படிக்கச் சிறக்கும் வாழ்வு!
படியார் அடைவார் தாழ்வு! 1
வயலை விளைக்கப் படிப்பு!
வேண்டும்! செந்நெல் முடிப்புப்
பெயலே இல்லாப் போதும்
பெருகச் செய்யும் படிப்பு! 2
சின்னச் சின்னத் தொழிலைச்
செழிக்கச் செய்யும் படிப்பு!
பொன்னை அளிக்கும் படிப்பு!
புகழை அளிக்கும் படிப்பு! 3
வீட்டைத் துலக்கப் படிப்பு!
வீரம் செழிக்கப் படிப்பு!
நாட்டைத் துலக்கப் படிப்பு!
நாளும் வேண்டும் படிப்பு! 4
இன்னே படிக்க வேண்டும்!
என்றும் படிக்க வேண்டும்!
உன்னை ஈன்ற நாட்டிற்(கு)
உழைக்கப் படிக்க வேண்டும்! 5
தொழிலைப் படிக்க வேண்டும்!
தொழில் துறையைப் படிக்க வேண்டும்!
அழிவே இல்லாக் கல்வி
ஆண்பெண் படிக்க வேண்டும்! 6
தாய்மொழியே தமிழ்மொழியாம்! கண்டாய்!-அதைத்
தட்டாமல் நீபடிப்பாய் நன்றாய்!
காய்நிலவின் இனிமை நனிஉண்டு!-நாளும்
கற்றுணரக் கட்டிக் கற்கண்டு! 1
செந்தமிழோ தீங்கருப்பஞ் சாறு!-பள்ளி
சென்றுகற்கப் பொன்னிவள ஆறு
சொந்தமொழி தமிழ்மொழியைப் போல-உனக்(கு)
எந்தமொழி இனிமைதரும் கூறு? 2
கற்றவரே கண்ணுடையார் என்றும்!-கல்வி
கல்லாதார் புண்ணுடையார் இன்றும்!
உற்றபொருள் கல்வியல்லால் உண்டோ?-நாட்டில்
மற்றபொருள் நிலைத்திருப்ப துண்டோ? 3
கொடுக்கக் குறையாத பொருள்கல்வி!-என்றும்
கொள்ளக் குறையாத பொருள்கல்வி!
எடுக்கக் குறையாத பொருள்கல்வி!-மாற்றார்
எரிக்கக் குறையாத பொருள்கல்வி! 4
இளமையினில் கற்கை மிகநன்று-அந்த
இளமையினைப் போக்கி வீணேநின்று
வளமிழந்த பேர்கள் பலருண்டு!-மூத்த
வயதினிலும் படித்தாற் பயனுண்டு! 5
படித்துணரார் விளையாட்டுப் பொம்மை-ஏட்டுப்
படிப்பிலையேல் என்னுண்டாம் நன்மை?
அடுத்தடுத்து நீபடிக்க வேண்டும்!-நல்ல
அறிவுண்டாம் புகழ்உண்டாம் யாண்டும்! 6
கற்றபடி நீநடக்க வேண்டும்!-ஏட்டில்
கண்டகளை நீவிலக்க வேண்டும்!
பெற்றவர்கள் உனைக்கண்டு மகிழ்வார்-வேறு
பிறநாட்டார் உனைக்கண்டு புகழ்வார்! 7
படித்தபயன் அறிவோடு வாழ்தல்!-அந்தப்
பண்பிலையேல் உனக்குண்டாம் தாழ்தல்
படித்தவருக் கெந்நாடும் நாடே!-நன்னூல்
படியாதார்க் கெந்நாடும் காடே! 8
கல்வியினால் உலகம்முன் னேறும்!-இதைக்
காணும்பொருள் ஒவ்வொன்றும் கூறும்!
கல்வியினால் வாழ்வளிக்கக் கூடும்!-வான்
கதிர்நிலவைக் கைக்கொள்ளக் கூடும்! 9
கல்வியின்றேல் தொழில்சிறப்ப தில்லை!-எந்தக்
கவின்கலையும் நாடடைவ தில்லை!
செல்வமிது செல்வமிது தேடே!-என்றும்
செழித்திருக்கும் உனையின்ற நாடே! 10
கட்டாயம் கல்வி! கட்டாயம் யார்க்கும்!
கட்டாயம் கல்வி! கட்டாயம் என்றும்!
பொட்டல் வெளிக்கு நிழலைப் போலப்
பூத்த மலர்க்கு மணத்தைப் போல- 1
நட்ட நிலத்து வரப்பைப் போல
நன்செய் புன்செய் மழையைப் போலக்
கட்டிய வீட்டுக்குக் கதவைப் போலக்
கைவி ளக்குக்கு நெய்யைப் போல- 2
கட்டை வண்டிக்(கு) ஆனியைப் போலக்
காளை மாட்டுக்குக் கயிற்றைப் போலப்
பெட்டி பேழைக்குச் சாவியைப் போலப்
பெரிய குளத்திற்குப் படியைப் போல-3
விளைந்த தோப்புக்குக் காவல் போல
வெள்ள ஆற்றுக்குக் கரையைப் போல
வளர்ந்த கொடிக்குக் கொம்பைப் போல
மங்கை எழிற்கு விழியைப் போல- 4
உண்ணும் உணவுக்(கு) உப்பைப் போல
ஊரின் இருளுக்(கு) ஒளியைப் போல
பண்ணுக் கியைந்த பாடல் போலப்
படிப்புக் கேற்ற ஒழுக்கம் போல- 5
உடலை மறைக்கும் ஆடை போல
உழைப்புக் கேற்ற விளைவு போலக்
கடலை நோக்கும் விளக்கைப் போலக்
கண்ணைக் காக்கும் இமையைப் போல- 6
வறுமை மாற்றப் புரட்சி போல
வாழ்வுக் கேற்ற வளப்பம் போலப்
பொறுமைக் கேற்ற புகழைப் போலப்
புலிக்கு வாய்த்த வலியைப் போல - 7
காலை தோன்றும் கதிரைப் போலக்
கடலில் தோன்றும் முத்தைப் போல
மாலை தோன்றும் மதியம் போல
வாழ்க்கைக் கேற்ற நெறியைப் போல- 8
ஊருக் கேற்ற ஆறு போல
உடலுக் கேற்ற உணவு போல
ஏரிக் கேற்ற மதகு போல
இளமைக் கேற்ற வளமை போல- 9
புண்ணுக் கேற்ற மருந்து போலப்
பொருளுக் கேற்ற கொடையைப் போலக்
கண்ணுக் கழகாம் கருணை போலக்
கதைக்கு மூலக் கருவைப் போல- 10
காலை மாலை உடற்பயிற்சி
கடுநோய் போக்கும் நல்முயற்சி!
காலை மாலை உடற்பயிற்சி!
கைகால் உடலுயிர் நல்வளர்ச்சி! 1
குந்தி எழுந்தாற் கால்கையும்,
குடரும், இடையும் வலிவெய்தும்!
பந்தை அடித்தால் துடைமார்பும்
பாறை போல் விரிவடையும்! 2
நிலவில் 'பாரி' அடிப்பதுவும்,
நீரில் 'ஓரி' அடிப்பதுவும்,
அலைகடல் மூழ்கிக் குளிப்பதுவும்
அறிவுடற் காக்கம் அளிப்பனவாம்! 3
கைகால் சோர ஆடுவதும்,
கடற்கரை மணலில் ஒடுவதும்,
மெய்யை வளைத்துப் பின்நிமிர்ந்தே
விறைத்து நடப்பதும் நன்மருந்தே!4
சிலம்பக் கூடம் உண்டாக்கி
முன்னாள் செய்தார் உடற்பயிற்சி!
நலங்கொள் உடலே பெருஞ்செல்வம்!
நாளும் செய்வாய் உடற்பயிற்சி! 5
பள்ளி பயிலும் சிறுவர் நாளை
பாரை ஆளப் போறீர்!-தமிழ்
ஊரை ஆளப் போறீர்!
பள்ளிப் படிப்பு பாதி யானால்
பாரை எப்படி ஆள்வீர்?-தமிழ்
ஊரை எப்படி ஆள்வீர்? 1
கல்வி பயிலும் சிறுவர் நாளை
கடலைத் தாண்டப் போறீர்!-நீர்த்
திடலைத் தாண்டப் போறீர்!
கல்வி கற்றுத் தெளியா விட்டால்
கடலை எப்படி ஆள்வீர்?-நீர்த்
திடலை எப்படி ஆள்வீர்? 2
சாலை பயிலும் சிறுவர் நாளை
தண்டெ டுக்கப் போறீர்!-மறத்
தொண்ட ளிக்கப் போறீர்!
சாலைப் படிப்பைத் தட்டிக் கழித்தால்
தண்டெ டுக்கப் போமோ?-மறத்
தொண்ட ளிக்கப் போமோ? 3
மன்றம் பயிலும் சிறுவர் நாளை
வானம் ஆளப் போறீர்!-தமிழ்
வானம் ஆளப் போறீர்!
மன்றப் படிப்பின் வளங்கு றைந்தால்
வானம் ஆளப் போமோ?-தமிழ்
மானம் மீளப் போமோ? 4
அரங்கு பயிலும் சிறுவர் நாளை
ஆட்சி செய்யப் போறீர்!-தமிழ்
ஆட்சி செய்யப் போறீர்!
அரங்குக் கல்வி குறைந்தால் நாளை
ஆட்சி செய்யப் போமோ?-தமிழ்
மீட்சி செய்யப் போமோ? 5
திண்ணை பயிலும் சிறுவர் நாளை
மண்ணை ஆளப் போறீர்!-தமிழ்
மண்ணை ஆளப் போறீர்!
திண்ணைப் படிப்புச் சிறுத்து விட்டால்
மண்ணை ஆளப் போமோ?-தமிழ்
விண்ணை ஆளப் போமோ? - 6
வீட்டிற் பயிலும் சிறுவர் நாளை
வெற்றி கொள்ளப் போர்!-பகை
வெற்றி கொள்ளப் போரீர்!
வீட்டுப் படிப்பு மிகக்கு றைத்தால்
வெற்றி கொள்வ தெப்போ?-பகை
சுற்றி உள்ள திப்போ! 7
அறையில் பயிலும் சிறுவர் நாளை
ஆக்கஞ் செய்யும் அறிஞர்!-தமிழுக்(கு)
ஊக்கஞ் செய்யும் அறிஞர்!
அறைப்ப டிப்பும் அறையில் நின்றால்
ஆக்கஞ் செய்வ தெப்போ?-தமிழுக்(கு)
ஊக்கஞ் செய்வ தெப்போ? 8
தொழில் பயிலும் சிறுவர் நாளை
தொழில் நிறைக்கப் போறீர்!-நாட்டின்
எழில் நிறைக்கப் போறீர்!
தொழிற் பயிற்சி துண்டு பட்டால்
துயர்து டைப்ப தெப்போ?-நாட்டின்
உயர்வ ளிப்ப தெப்போ? 9
கலை பயிலும் சிறுவர் நாளை
நிலை யுயர்த்தப் போறீர்!-நாட்டின்
நிலை யுயர்த்தப் போறீர்!
கலைப் பயிற்சி கருகி விட்டால்
நிலை யுயர்த்தல் எப்போ?-மக்கள்
தலை யுயர்த்தல் எப்போ? 10
