தமிழியக்கம்/மாணவர்

by பாரதிதாசன்

⁠௧௬. மாணவர்

கற்கின்ற இருபாலீர்!
    தமிழ்நாட்டின் கண்ணொப்பீர்
        கனியி ருக்க
நிற்கின்ற நெடுமரத்தில்
    காய்கவர நினையாதீர்
        மூது ணர்வால்
முற்கண்ட எவற்றினுக்கும்
    முதலான நந்தமிழை
        இகழ்த லின்றிக்
கற்கண்டாய் நினைத்தின்பம்
    கைக்கொணடு வாழ்ந்திடுவீர்
        நன்றே என்றும். ⁠76

ஆங்கிலத்தைக் கற்கையிலும்
    அயல்மொழியைக் கற்கையிலும்
        எந்த நாளும்
தீங்கனியைச் செந்தமிழைத்
    தென்னாட்டின் பொன்னேட்டை
        உயிராய்க் கொள்வீர்,
ஏங்கவைக்கும் வடமொழியை,
    இந்தியினை எதிர்த்திடுவீர்
        அஞ்ச வேண்டாம்.
தீங்குடைய பார்ப்பனரின்
     ஆயுதங்கள் “இந்தி” “வட
        சொல்“ இரண்டும். ⁠77

பார்ப்பான்பால் படியாதீர் ;
     சொற்குக் கீழ்ப் படியாதீர்
        உம்மை ஏய்க்கப்
பார்ப்பான்; தீ துறப்பார்ப்பான்
     கெடுத்துவிடப் பார்ப்பான் எப்
        போதும் பார்ப்பான்
ஆர்ப்பான் நம் நன்மையிலே
     ஆர்வமிக உள்ளவன்போல்!
        நம்ப வேண்டாம்.
பார்ப்பானின் கையை எதிர்
     பார்ப்பானை யேபார்ப்பான்
         தின்னப் பார்ப்பான். ⁠78

தமிழின்பேர் சொல்லி மிகு
    தமிழரிடைத் தமிழ் நாட்டில்
        வாழ்ந்திட் டாலும்
தமிழழித்துத் தமிழர் தம்மைத்
    தலை தூக்கா தழித்துவிட
        நினைப்பான் பார்ப்பான்.
அமுதாகப் பேசிடுவான்
    அத்தனையும் நஞ்சென்க
        நம்ப வேண்டாம்
தமிழர்கடன் பார்ப்பானைத்
    தரைமட்டம் ஆக்குவதே
        என்று உணர்வீர். ⁠79

தமிழரின்சீர் தனைக்குறைத்துத்
    தனியொருசொல் சொன்னாலும்
        பார்ப்பான் தன்னை
உமிழ்ந்திடுக! மானத்தை
    ஒரு சிறிதும் இழக்காதீர்
        தமிழைக் காக்க
இமையளவும் சோம்பின்றி
    எவனுக்கும் அஞ்சாது
        தொண்டு செய்வீர்
சுமை உங்கள் தலைமீதில்
    துயர்போக்கல் உங்கள்கடன் !
        தூய்தின் வாழ்க! ⁠80