8 ம் திருமொழி விண்ணீல மேலாப்பு
மேகவிடு தூது
தரவு கொச்சகக் கலிப்பா
விண்ணீல மேலாப்பு விரித்தாற்போல் மேகங்காள்!*
தெண்ணீர்பாய் வேங்கடத்தென் திருமாலும் போந்தானே*
கண்ணீர்கள் முலைக்குவட்டில் துளிசோரச் சோர்வேனை*
பெண்ணீர்மை யீடழிக்கும் இதுதமக்கோர் பெருமையே? 1
மாமுத்த நிதிசொரியும் மாமுகில்காள்!* வேங்கடத்துச்
சாமத்தின் நிறங்கொண்ட தாடாளன் வார்த்தையென்னே*
காமத்தீ யுள்புகுந்து கதுவப்பட்டு இடைக்கங்குல்*
ஏமத்தோர் தென்றலுக்கிங்கு இலக்காய்நா னிருப்பேனே. 2
ஒளிவண்ணம் வளைசிந்தை உறக்கத்தோ டிவையெல்லாம்*
எளிமையால் இட்டென்னை ஈடழியப் போயினவால்*
குளிரருவி வேங்கடத்தென் கோவிந்தன் குணம்பாடி*
அளியத்த மேகங்காள்! ஆவிகாத் திருப்பேனே. 3
மின்னாகத் தெழுகின்ற மேகங்காள்!* வேங்கடத்துத்
தன்னாகத் திருமங்கை தங்கியசீர் மார்வற்கு*
என்னாகத்து இளங்கொங்கை விரும்பித்தாம் நாடோறும்*
பொன்னாகம் புல்குதற்கென் புரிவுடைமை செப்புமினே. 4
வான்கொண்டு கிளர்ந்தெழுந்த மாமுகில்காள்!* வேங்கடத்துத்
தேன்கொண்ட மலர்ச்சிதறத் திரண்டேறிப் பொழிவீர்காள்!*
ஊன்கொண்ட வள்ளுகிரால் இரணியனை யுடலிடந்தான்*
தான்கொண்ட சரிவளைகள் தருமாகில் சாற்றுமினே. 5
சலங்கொண்டு கிளர்ந்தெழுந்த தண்முகில்காள்!* மாவலியை
நிலங்கொண்டான் வேங்கடத்தே நிரந்தேறிப் பொழிவீர்காள்!*
உலங்குண்ட விளங்கனிபோல் உள்மெலியப் புகுந்து*என்னை
நலங்கொண்ட நாரணற்கென் நடலைநோய் செப்புமினே. 6
சங்கமா கடல்கடைந்தான் தண்முகில்காள்!* வேங்கடத்துச்
செங்கண்மால் சேவடிக்கீழ் அடிவீழ்ச்சி விண்ணப்பம்*
கொங்கைமேல் குங்குமத்தின் குழம்பழியப் புகுந்து*ஒருநாள்
தங்குமேல என்னாவி தங்குமென் றுரையீரே. 7
கார்காலத் தெழுகின்ற கார்முகில்காள்!* வேங்கடத்துப்
போர்காலத் தெழுந்தருளிப் பொருதவனார் பேர்சொல்லி*
நீர்காலத் தெருக்கிலம் பழவிலைபோல் வீழ்வேனை*
வார்காலத்து ஒருநாள்தம் வாசகம்தந்து அருளாரே. 8
மதயானை போலெழுந்த மாமுகில்காள்!* வேங்கடத்தைப்
பதியாக வாழ்வீர்காள்! பாம்பணையான் வார்த்தையென்னே*
கதியென்றும் தானாவான் கருதாது*ஓர் பெண்கொடியை
வதைசெய்தான் என்னும்சொல் வையகத்தார் மதியாரே. 9
நாகத்தின் அணையானை நன்னுதலாள் நயந்துரைசெய்*
மேகத்தை வேங்கடக்கோன் விடுதூதில் விண்ணப்பம்*
போகத்தில் வழுவாத புதுவையர்கோன் கோதைதமிழ்*
ஆகத்து வைத்துரைப்பார் அவரடியா ராகுவரே. 10
ஆண்டாள் திருவடிகளே சரணம்
