முடியரசன் தமிழ் வழிபாடு/026-049
குடும்பம் எனக்கோர் நடைவண்டி - நல்ல
கொள்கை வெறிதான் தொடர்வண்டி
இடும்பை தவிர்த்திடும் முப்பாலே - என்னை
இனிதே வளர்த்திடும் தாய்ப்பாலாம்.
ஆயும் மொழியே சிறுகோலி - அதனை
அறிவால் தெறிப்பேன் குழிகோலி
பாயும் குழியோ கவியாகும் - ஆடல்
பார்த்து மகிழ்வது புவியாகும்.
பாமலர் என்றன் மழலைமொழி - பாட்டில்
பாவும் பொருளே குவளைவிழி
மாமழை வானந் தவழும்வழி - அங்கே
மதியம் உருள்பந் தெனதுவழி.
காவியம் என்றன் மணல்வீடு - பொங்கும்
கற்பனை யதுதான் சிறுசோறு
வாவினி அம்மா மகிழ்வோடு - நெஞ்சின்
வாழை விரிப்பேன் பரிவோடு.
உலகின் நிலையே தெரியவிலை - அங்கே
உண்மையும் பொய்யும் புரியவிலை
அலகில் விளையாட் டாடிவேன் - என்னோ
டாரும் வரவிலை கூடிடவே.
உள்ளஞ் சுடுசொல் பொறுப்பதிலை - சொன்னால்
உடனே அழுவேன் வெறுப்பதிலை
கள்ளங் கவடந் தரிப்பதிலை - நீயேன்
கனிவாய் மலர்ந்தே சிரிப்பதிலை?
அழுக்கா றாசை வெகுளியெனும் - நெஞ்சின்
அழுக்குகள் யாவுங் கழுவினை நீ
இழுக்கா மானம் அருளறிவு - அணிகள்
எத்தனை எத்தனை அருளினை நீ!
நின்னருள் மாமழை பொழிந்திடுவாய் - நானும்
நீங்கா ததனுள் நினைந்திடுவேன்
என்னுயிர் நீதான் தமிழம்மா - என்னை
எடுத்தொரு முத்தம் அருளம்மா.
[பாடுங்குயில்]