அரசர் அரசவையில் நீண்ட நெடுநேரம் கழிக்க, மருத்துவரோ மந்திரியோ அவர்களை நோக்கி, “நேரம் மிகவும் கழிந்துவிட்டது, நடுநிசியாகிவிட்டது. எனவே இன்துயில் கொள்ளச் செல்வீராக” எனக்கூறுவது கண்படைநிலை என்பதாகும்.

கண்படை நிலையே காவலன் அவைக்கண்
சுற்றம் குழூஉத்துணை சூழ இருத்தலின்
நெடும் பொழுது உரிவரும் நித்திரை கூறலே.
- பிரபந்த தீபிகை 60

அரசரு மரசரைப் போல்வாரு மவைக்கணெடிது வைகியவழி 
மருத்துவரு மமைச்சரு முதலியோ ரவர்க்குக் கண்டுயில் 
கோடலைக் கருதிக் கூறுவது.
- தொன்னூல் விளக்கம் உரை பக்கம் 204

கண்படை கண்ணிய கண்படை நிலையே
- தொல்காப்பியம்  - பொருளதிகாரம் 87

மண் கொண்ட மறவேந்தன் கண்படைநிலை மலிந்தன்று 
- புறப்பொருள் வெண்பாமாலை 183

எனது இன்னுயிர் நாயகர் பிரம்மோதய மெய்வழிச் சாலை ஆண்டவர்கள், ஊண் உறக்கமற்ற ஒருதனி முதல்வர். அவர்களை உறங்கச் செல்க என்றோ உறக்கத்தினின்று விழித்து எழுக என்றோ விழைவது பொருந்தாது. எனினும் இரவு பதினொரு மணிக்கு தவத்திற்கு எழுதல் வேண்டும் என்று திருவுளத்திற்கு நினைவு கூர்ப்பிப்பது வழக்கமாக இருந்தது. தவம் என்பது தூலம், சூக்குமம், காரணம், மகா காரணம் கடந்து பிரம்மரந்திரத்தில் புறநினைவற்று ஆழ்ந்து நிற்றல். அஃதும் ஒருவழித்துயில் போலும் அறிதுயில் நிலை ஆகலான் அதனைக் கண்படைநிலை எனக் கொளலாகும்

.

திருக்கண்படைநிலை

காப்பு

அருட்கண் அரசே அமரா பதியே
திருக்கண் படையார் நிலையே மொழிய
பொருட்சொன் மலர்கள் உரைநற்றி றன்கள்
அருள்க அடியேன் சரணம் சரணம்

நூல்

கலித்தாழிசை

சமரசமிங் ஙுலகினிலே தழையவெனத் திருவுளங் கொண்(டு)
இமையவரை புவியினில்போய்ப் பிறமினென உரைவரைந்து
தமையுமொரு மனுமகனாய்த் திருவுருக்கொண் டவதரித்தீர்
உமைகேள்வ! ஒருமெய்வழி ஆண்டவரே தாலேலோ! ⁠(1)

அவதரித்த அருட்சிவமும் அரியயனும் ஒருங்கிணைந்த
தவபரமே! செழுமணியே! திகழனந்தர் தலைவரெங்கள்
நவநிதியே! நலமனைத்தும் திரள்உருவே! நடத்தரசே!
பவப்பிணியைக் கடத்துமொரு பரந்தாமா! தாலேலோ! ⁠(2)

மதிமணியே! மலர்மணமே! மறைதெளியும் துறையெனுமோர்
புதியவரே! புனிதமுயர் அமுதவரே! அறஞ்சுரந்த
நதியவரே! நிலவுலகில் தவமுறையில் நிலைபெறுமெய்க்
கதியவரே! கழல்மலரே அடைக்கலமே! தாலேலோ! ⁠(3)

எமதுயிர்கள் உயர்நலமே பெறவருள்செய் களஞ்சியமே!
உமதுபணி வருங்காலத் ததிகதிடம் உளவாக
உமதுதிரு மலர்மேனி அயர்வறவே இதுகாலே
இமைமலரா மலரிதழ்போன்ம் அறிதுயில்வீர்! தாலேலோ! ⁠(4)

அடிமலர்கள் நிலம்படிய அகிலத்தாய் சிலிர்சிலிர்க்க
வடிவுடைய தனிகைமணி தருமகவே பணிமிகையால்
மடிவதுபோன்ம் மலர்மேனி களைப்புறுமே அதுகருதி
கடிகைசிறி தளவயர்க கனிமொழியீர் தாலேலோ! ⁠(5)

படைத்தபெரும் கடவுளரே! பணிஓய்வு நுமக்கிலையே
மடைதிறந்து அமுதுபொழிந் திரவுபகல் கருதாமை
உடையவரே உமதுதிரு வுளமதனில் உறுதியரே!
கடைச்சிறியேன் விழைவேற்று அறிதுயில்வீர் தாலேலோ! ⁠(6)

இனியெவரும் இதுபோலும் அருள்வழங்க வருவதிலை
தனியொருவர் இதுபணியே புரிவதென முனைந்தீரே!
தனிகையரும் அதுகருதி வருகைதரும் அதனாலே
கனியமுது வழங்குகொடைக் கரத்தீரே! தாலேலோ! ⁠(7)

மதவெறிகொள் மதகரிகள் இனவெறிகொள் வரிப்புலிகள்
இதமறியாக் குலவெறியர் எனுமிருக மவைஎதிர்த்து
விதவிதமாய்ச் சமர்புரிந்து அவையடங்க அழித்தொழிக்க
மதியரசே பணியுளதால் சற்றயர்வீர்! தாலேலோ! ⁠(8)

குணம்பலவாய் உளமாந்தர் கொடுமைகளைக் களைந்தெரிய
வணம்பலவாய் உளவறிந்து வளர்கொடுமை விலகிடவே
கணந்தோறும் உழைப்பதெனக் கனிந்துளத்தே துணிந்தவரே
மணம்திமிரும் திருமேனி களைப்பாறத் தாலேலோ! ⁠(9)

இனியுலகில் மதமொன்று குலமொன்று இனமொன்று
தனிமெய்வழி தருமதுரை அதுநிறுவும் திறத்தவரே
இனித்தமுற அதுகருதி இளைப்பாறும் எம்சாமி
நனிஇசைகேண்ம் இமையமைந்து அறிதுயில்வீர்! தாலேலோ! ⁠(10)

திருக்கண்படை நிலை இனிது நிறைவு பெற்றது.

குரு வாழ்க! குருவே துணை!

எல்லாம் ஆண்டவர்கள் தயவு!

திவ்வியப் பிரபந்த மணிமாலைகள் 108/030.திருக்கண்படை நிலை

உள்ளடக்கம்

✫30.கண்படை நிலை தொகு

இலக்கணம்:-

திருக்கண்படைநிலை

காப்பு

நூல்