தசம் + அங்கம் = தசாங்கம்.தசம் எனில் பத்து என்னும் எண்ணைக் குறிப்பிடுகின்றது. ஓர் அரசனின் சின்னங்களான. மலை, ஆறு, நாடு, ஊர், பறை, பரி, குதிரை, கரி(யானை), தார்(மாலை) பெயர், கொடி என்பன அப்பத்து.

மலையே, யாறே, நாடே, ஊரே
பறையே, பரியே, களிறே தாரே
பெயரே கொடியே என்றிவை தசாங்கம்
- பன்னிரு பாட்டியல் 140

நேரிசை வெண்பா வால்நிரு பன்பெறும்
தசாங்கத் திணைச்சொலல் தசாங்கப் பத்தாம்
- இலக்கண விளக்கம் 840

பவனமுறு வரசனுக் குற்றிடுத சாங்கமும்
பாடுநே ரிசை வெள்ளையால்
பத்துச் செ யுள்கூற லதுவேத சாங்கமுறு
பத்தென வுரைப் பார்களே
- பிரபந்ததீபிகை 25

என் உயர்க்குயிராகி ஆண்டு கொண்டு அருள் பாலிக்கும் தேவலோக ராஜாதி ராஜராகிய பிரம்மோதய மெய்வழிச் சாலை ஆண்டவர்களின் திருநாமம், திருவூர், திருநாடு, திருநதி, திருமலை, திருப்புரவி, திருயானை, திருக்கொடி, திருமுரசு, திருமாலை முதலியவற்றைப் பத்து வெண்பாக்களால் இப்பனுவலின் பாடப்பெற்றுள்ளது,

திருத்தசாங்கம்

காப்பு

வையம் உய்ந்திட வந்தவ தாரமே
ஐயன் பொன்னெழில் தாள்மலர் காப்பிதே
மெய்வ ழிதெய்வ வான்புகழ் ஓங்கவே
உய்யப் பாடும் உவந்துத சாங்கமே.

நூல்

திருநாமம்

கலிவெண்பா

சீராயி ரம்கொண்ட தெய்வ தயாபரர்க்குப்
பேராயி ரம்செப்பிற் போதுவதோ - நேர்மெய்
குருஆண் மகரிஷி மார்க்கநன் நாதர்
திருசாலை ஆண்டவர்தாம் செப்பு. ⁠(1)

திருவூர்

செயிர்தீர்த்துக் கூற்றுவனின் தீங்ககற்றும் சாலை
உயிர்ப்பயிரேற் றும்ஊர்காண் ஓங்கும் - வியன்புவியில்
பொன்னரங்கர் தன்னனந்தர் போற்றிவணக் கம்புரியும்
இன்னருள்சேர் மெய்வழிச் சாலை. ⁠(2)

திருநாடு

எண்ணாயி ரம்கற்பம் யோகம் இருந்தாலும்
எண்ணம்பே ரின்பத்தே நின்றிலங்கும் - பண்ணெழில்சேர்
மெய்குண்ட வானரசு சாலையண்ணல் வாழ்பதிகாண்
மெய்குண்டம் கயிலாயம் காண். ⁠(3)

திருநதி

வற்றாது வன்பிறவி வெவ்வினைகள் தீர்த்தருளும்
நற்றேன் சுவைகனியும் நன்னதிகாண் - பொற்றாளில்
தான்பொங்கும் தண்ணெழில்சேர் சீர்பொங்கும் கோன்செங்கை
வான்கங்கை எங்கள் நதி ⁠(4)

திருமலை

சார்ந்தவர்மெய்த் தங்கமெனச் சாயுச்யம் தான்வழங்கும்
ஆர்ந்தொளிரும் பொன்னசலம் ஆண்டவர்தான் - கார்கொண்டல்
தான்தவழும் வான்மேரு சற்சனர்கள் காண்மேரு
கோன்மேரு எங்கள் மலை. ⁠(5)

திருப்புரவி

ஓர்நொடிக்கு ஓரண்டம் ஓடிப்பாய் வாசியெனும்
சீர்துடிக்கும் வெண்புரவி செம்மலர்த்தாள் - ஆர்ப்பரித்து
அண்ட சராசரங்கள் எங்கும் உலாவிவரும்
அண்டர்கோன் தெய்வப் பரி. ⁠(6)

திருயானை

கல்லானைக் கற்பித்து காத்தானைக் காத்தானை
நல்லாணை நற்கதிசேர் வெள்ளானை - வெல்யானை
பேதானை மீதானை நாதானை மெய்யானை
போதானை தெய்வக் கஜம். ⁠(7)

திருக்கொடி

வளரும் பிறைவடிவம் வண்ணம்கிள் நாமம்
மிளிரும் கொடிவிண் தடவும் - ஒளிரும்
இசைந்தேமெய் சார்ந்து இனிதுய்ய வம்மின்
அசைந்தசைந்து கூவும் கொடி. ⁠(8)

திருமுரசு

“எழும்எழும்” இன்னே எமன்வரும் முன்னே
“தொழும்தொழும்” தெய்வம் பணிகென் - முழங்கும்
“துடும்துடும்” என்று நகரா முரசு
தடும்இடர் உய்மின் இனிது. ⁠(9)

திருமாலை

பைந்தார் துளபமதும் பார்மணக்கும் மல்லிகைஅ
ணிந்தா ரெனினும் அனந்தர்தம் - செந்தூர்ச்
சிரோமகுடம் பூண்ட சிரமாலை யஃதே
வரோதயர் வேட்கின்ற தார். ⁠(10)

திருத்தசாங்கம் இனிது நிறைவு பெற்றது.

குரு வாழ்க! குருவே துணை!

எல்லாம் ஆண்டவர்கள் தயவு!

திவ்வியப் பிரபந்த மணிமாலைகள் 108/049.திருத்தசாங்கம்

உள்ளடக்கம்

49. தசாங்கம்

இலக்கணம்:-